आहारावर लक्ष ठेवणारं करिअर

सुचित्रा सुर्वे, ग्रोथ सेंटर आणि आरोग्य याबाबत आजची पिढी ही खूप जागरुक आहे. प्रत्येकाचा रोजचा आहार कसा असावा, योग्य आहाराद्वारे आपली प्रकृती आणि आरोग्य उत्तम कसं राखता येईल, याबद्दल आपण सगळेच बऱ्यापैकी सजग झालो आहोत. परिणामी, डाएटीशियन या क्षेत्राला असणारी मागणी मोठ्या प्रमाणावर वाढली आहे. डाएटीशियन या क्षेत्राला वेगवेगळ्या स्तरातून मागणी वाढत आहे. काहीतरी नाविन्यपूर्ण आणि वेगळं असं करिअर निवडायचं असेल तर न्यूट्रिशनिस्ट आणि डाएटीशियनचा पर्याय योग्य ठरेल. कामाचं स्वरुप तरुण, वृद्ध, रुग्ण, नुकत्याच माता झालेल्या स्त्रिया, खेळाडू, आरोग्यविषयक सजग व्यक्ती (हेल्थ कॉन्शिअस), प्रसारमाध्यमात काम करणाऱ्या व्यक्ती, मनोरंजन क्षेत्रात काम करणारे कलाकार, अभिनेते मंडळी अशा तऱ्हेतऱ्हेच्या लोकांना त्यांच्या प्रकृतीनुसार आहार आणि आरोग्य (फिटनेस) याबाबत मार्गदर्शन करण्याचं काम या तज्ज्ञांना करावं लागतं. प्रत्येकाच्या प्रकृतीबरोबरच प्रोफेशन, जीवनशैली आणि आरोग्याबाबतच्या इतर तक्रारी जाणून घेतल्यावरच त्यांना आहाराबाबतचा सल्ला दिला जातो. आहाराविषयक सल्ला देण्याव्यतिरिक्त संशोधन करून अन्नपदार्थांची चव, रंग, त्याचं दिसणं (प्रेझेंटेशन), पदार्थ बनवण्याची पद्धत यात सुधारणा घडवून आणण्याचं कामही डाएटीशियन्सना करावं लागतं. या क्षेत्रात काम करण्याऱ्या तज्ज्ञांना क्लिनिकल डाएटीक्स किंवा रिसर्च डाएटीक्स, पब्लिक हेल्थ, फूड सर्व्हिस अ‍ॅडमिनिस्ट्रेशन/इंडस्ट्रीमध्ये कामाच्या संधी उपलब्ध आहेत. डाएटीशियन आणि न्यूट्रिशनिस्ट म्हणून काम करताना (डाएट फूड सर्व्हिस प्रोग्रॅम) विषयक योजना आखणं, समुपदेशन (काऊन्सिलिंग) करणं आदी कामांची जबाबदारीही घ्यावी लागते. करिअरच्या संधी डाएटीशियन म्हणून तुम्ही हेल्थ केअर सेंटरमध्ये काम करू शकता. याशिवाय, अ‍ॅडमिनिस्ट्रेशन, रिसर्च (संशोधन), शैक्षणिक क्षेत्रातही करिअरच्या अनेक संधी आहेत. स्वत:ची कन्सल्टेशन फर्म/एजन्सी सुरू करण्याचा पर्यायही तुमच्याकडे आहे. तसंच नर्सिंग होम्स, शाळा, तुरुंग, कम्युनिटी हेल्थ प्रोग्राम्स, गावागावातील हेल्थ केअर सर्व्हिसेस, फूड सर्व्हिस कॉन्ट्रॅक्टर्स, सोशल सर्व्हिस एजन्सीज, मोठमोठ्या कंपन्या, फिजिशियन्सची क्लिनिक्स इथेही डाएटीशियन्सना उत्तम मागणी आहे. प्रशिक्षण आणि प्रवेश पात्रता डाएटीक्स हा एक स्पेशलाइज्ड असा विषय आहे. या विषयाचं प्रशिक्षण पोस्ट ग्रॅज्युएट स्तरावर उपलब्ध आहे. मायक्रोबायोलॉजी, केमिस्ट्री, होम सायन्स, मेडिसीन, हॉटेल मॅनेजमेंट आणि केटरिंग टेक्नॉलॉजी यापैकी एका विषयात तुम्ही ग्रॅज्युएशन पूर्ण केलेले असेल, तर पोस्ट ग्रॅज्युएट स्तरावर तुम्हाला डाएटीशियनचा कोर्स करता येतो. कोर्स उपलब्ध असणाऱ्या काही संस्था: •० एसएनडीटी विमेन्स युनिव्हर्सिटी, मुंबई ४०० ०२० •० युनिव्हर्सिटी ऑफ मुंबई, मुंबई ४०० ०३२ •० एम.एस. युनिव्हर्सिटी ऑफ बडोदा, वडोदरा ३९० ००२ •० नागपूर युनिव्हर्सिटी, नागपूर ४४० ००१ विविध वयोगटातील व्यक्तींनी त्यांच्या आरोग्यप्रकृतीप्रमाणे रोज कोणते अन्नपदार्थ घ्यायला हवेत याची माहिती, रुग्णाचं योग्य प्रकारे डायट काऊन्सिलिंग करणं, रुग्णाची प्रकृती समजून त्यांना मार्गदर्शन करणं आदी गुण डायटीशियन म्हणून तुमच्याकडे असणं आवश्यक आहे. हॉस्पिटल इंडस्ट्रीमध्ये नोकरी करण्यासाठी विविध जीवरासायनिक बाबी, विविध वैद्यकीय चाचण्या आणि प्रक्रिया यांना सामोरं जावं लागतं. कामाचा काही वर्षांचा अनुभव मिळाल्यावर स्वत:चा व्यवसाय सुरू करता येईल. जेणेकरून तुम्ही स्वत:ला शक्य तेव्हा काम करू शकता. याव्यतिरिक्त व्यवस्थापकीय कौशल्य तुमच्याकडे असणं तुमच्या प्रगतीसाठी सहाय्यकारक ठरू शकतं. संशोधनाचं कौशल्य तुम्हाला या क्षेत्रात आणखी मोठी झेप घेऊ देण्यास मदत करतील. प्रिया करकेरा, क्लिनिकल न्यूट्रिशनिस्ट

from Career News in Marathi: Career News, मराठी Career बातम्या | Maharashtra Times https://ift.tt/2PTS6bk
via IFTTT