करोना: MPSC ची परीक्षा आता २६ एप्रिलला

म. टा. प्रतिनिधी, पुणे विषाणूच्या वाढत्या प्रादुर्भावाच्या पार्श्वभूमीवर 'महाराष्ट्र लोकसेवा आयोगा'तर्फे (एमपीएससी) ५ एप्रिलला होणारी राज्यसेवा पूर्व परीक्षा आता रविवारी २६ एप्रिलला होणार असल्याचे जाहीर करण्यात आले आहे. यासोबतच ३ मेला होणारी दुय्यम सेवा संयुक्त पूर्व परीक्षा आता १० मेला घेण्यात येणार आहे. याबाबतचा निर्णय 'एमपीएसी'चे उपसचिव सुनील अवताडे यांनी जाहीर केला आहे. करोना विषाणू संसर्ग वाढत असल्याने राज्य सरकारने प्रतिबंधात्मक उपाय सुरू केले आहेत. त्यात शाळा-महाविद्यालये, वसतिगृहे-अभ्यासिका बंद करण्यात आल्या आहेत. त्यामुळे स्पर्धा परीक्षांची तयारी करणारे अनेक उमेदवार आपापल्या गावी परतले आहेत. राज्यात उद्भवलेली स्थिती विचारात घेऊन ५ एप्रिलची परीक्षा पुढे ढकलण्याची मागणी राज्यभरातील उमेदवारांकडून करण्यात येत होती. याबाबत 'महाराष्ट्र टाइम्स'नेही वेळोवेळी पाठपुरावा केला होता. 'एमपीएससी स्टुडंट राइट्स', 'एमपीएससी समन्वय समिती', आमदार कपिल पाटील आणि रोहित पवार यांनीही मागणीचे समर्थन करत परीक्षा पुढे ढकलण्याची मागणी केली होती. या मागण्यांची दखल आयोगाकडून घेण्यात आली आहे. आयोगाने जाहीर केलेल्या परिपत्रकानुसार ५ एप्रिलला होणारी राज्यसेवा पूर्व परीक्षा आणि ३ मेला होणारी संयुक्त पूर्व परीक्षा पुढे ढकण्यात आली आहे. आता राज्यसेवा पूर्व परीक्षा २६ एप्रिलला आणि संयुक्त पूर्व परीक्षा १० मे रोजी घेतली जाणार आहे. करोना विषाणू संसर्ग रोखण्याच्या उपाययोजना विचारात घेऊन परीक्षेच्या आयोजनासाठीचा फेरआढावा घेतला जाईल, असे प्रसिद्धीपत्रकात पत्रात नमूद केले आहे. दरम्यान, आयोगाच्या या निर्णयामुळे या परीक्षांची तयारी करणाऱ्या लाखो उमेदवारांना दिलासा मिळाला आहे. अधिक माहिती 'एमपीएससी'च्या वेबसाइटवर उपलब्ध करण्यात आली आहे.

from Career News in Marathi: Career News, मराठी Career बातम्या | Maharashtra Times https://ift.tt/2UaFbFg
via IFTTT