४३% पालकांकडे ऑनलाइन शिक्षणासाठी साधनंच नाहीत!

हैदराबाद: केंद्रीय मनुष्यबळ विकास मंत्रालयाने शालेय तसेच महाविद्यालयीन विद्यार्थ्यांना लॉकडाऊनच्या काळात देण्याचा निर्णय घेतला आहे. मात्र एका सर्वेक्षणातून असे पुढे आले आहे की ४३ टक्के पालकांकडे त्यांच्या मुलांना या ऑनलाइन क्लासेसमध्ये सहभागी करण्यासाठी आवश्यक ती साधनसामुग्रीच नाही. लोकल सर्कल्सने तेलंगणासह अनेक राज्यात हे सर्वेक्षण केले. २०३ जिल्ह्यातील २४ हजार पालकांना माहिती विचारण्यात आली. यापैकी अनेक पालकांकडे संगणक, टॅबलेट आदी सुविधा नाहीत. लोकल सर्कल्सचे महाव्यवस्थापक अक्षय गुप्ता म्हणाले, 'एमएचआरडीच्या निर्देशांनुसार सीबीएसीने व्हर्च्युअल क्लासरुम सुरू करण्याचा निर्णय घेतला. दीक्षा आणि स्वयं यासारख्या पोर्टल्सच्या माध्यमातून ऑनलाइन क्लास सुरू करण्यात आले. अनेक शाळा महाविद्यालयांना याबाबतची मार्गदर्शक तत्त्वेही देण्यात आली. झूम आमि मायक्रोसॉफ्ट टीम्सच्या माध्यामातून लेक्चर्स कसे घ्यायचे ते सांगण्यात आले. मात्र अनेक पालकांकडे कॉम्प्युटर्स, टॅबलेट्स, राउटर्स, प्रिंटर्स आदी सुविधा नाहीत.' गुप्ता यांनी असेही सांगितले की 'अनेक पालकांनी आम्हाला विचारलं की शाळा ऑनलाइन वर्ग घेत आहेत, पण आम्हीसुद्धा वर्क फ्रॉम होम करत आहोत, तर आमचा कॉम्प्युटर मुलांना कसा द्यायचा?' ज्यांच्याकडे संगणक किंवा टॅब आहेत, अशा पालकांपैकीदेखील अनेकांना शिक्षक जे स्क्रीन शेअर करतात ते योग्य रिझोल्युशन अभावी दिसत नसल्याची तक्रार आहे. ७ टक्के पालकांनी सांगितलं की त्यांनी कॉम्प्युटर, टॅबलेट, प्रिंटर, राऊटर आदी विकत घ्यावे लागेल. १० टक्क्यांकडे अतिरिक्त मोबाइल फोन नाही. तो त्यांना विकत घ्यावा लागणार आहे. लॉकडाउनमुळे सर्वच बंद आहे. परिणामी ऑनलाइन क्लासेसची संकल्पना कितीही चांगली वाटत असली तरी ती प्रत्यक्षात येताना खूप अडचणी येत आहेत.

from Career News in Marathi: Career News, मराठी Career बातम्या | Maharashtra Times https://ift.tt/2yxntDC
via IFTTT