जागतिक पुस्तक दिन: पुस्तकच बोलतं तेव्हा...

> ज्ञानेश्वरी वेलणकर कुणाकडून तरी गोष्ट ऐकण्यातली गंमत तुम्हीही अनुभवली असेल. आवाजात केले जाणारे चढ-उतार, रंगवलेली पात्रं, त्या काळाचं केलेलं वर्णन अशी रंगवून सांगितली जाणारी गोष्ट ऐकताना भान हरपतं. आताच्या फास्ट जमान्यात, पुस्तकंही ऐकवण्यासाठी आलेली ऑडिओ बुक्स लोकप्रिय असल्याचं दिसून येतंय. ऑडिओ बुक्सचं हे दालन तरुणांना खुणावत असतं. नेमकं काय? ऑडिओ बुक्स म्हणजे नेमकं काय? अगदी सोप्या भाषेत सांगायचं झालं, तर कुणीतरी आपल्याला एखादं पुस्तक वाचून दाखवणं. आपण ते पुस्तक वाचण्याऐवजी 'ऐकणं'. जगातलं सगळ्यात पहिलं ऑडिओ बुक हे १९३२ साली 'द अमेरिकन फाउंडेशन फॉर द ब्लाइंड' यांच्याकडून बनवण्यात आलं होतं. दृष्टीहीन व्यक्तींसाठी पुस्तकं उपलब्ध व्हावी या हेतूनं पुस्तकांचं हे ऑडियो रूप निर्माण करण्यात आलं होतं. १९८०च्या दरम्यान ऑडिओ बुक्स बनवणाऱ्या सुमारे ११ कंपन्या होत्या. पूर्वी कॅसेट्सवर उपलब्ध होणारी ही ऑडिओ बुक्स तंत्रज्ञानाच्या साथीनं अधिकाधिक प्रगत होत गेली. मग वॉकमन, सीडीपासून ते आता मोबाइल फोनपर्यंत येऊन ठेपली. इंग्रजीबरोबरच अनेक प्रादेशिक भाषांमध्येसुद्धा ही पुस्तकं आता श्रोत्यांसाठी उपलब्ध आहेत. खास करून नेत्रहीन आणि दिव्यांग मंडळींना ही ऑडियो बुक्स विशेष उपयोगी ठरतात. का ऐकली जातात? आयुष्याच्या सुपरफास्ट वेगामुळे पुस्तकं वाचण्यासाठी वेगळा वेळ काढणं अनेकांना शक्य होत नाही. त्यांच्यासाठी ही ऑडियो बुक्स उपयुक्त ठरतात. प्रवासात किंवा घरातही एखादं काम करताना तुम्ही ती ऐकू शकता. कोणीतरी आपल्याला गोष्ट सांगतंय हा अनुभव विशेष ठरतो, असं अनेकांचं म्हणणं आहे. पुस्तक ऐकल्यामुळे पुस्तक वाचनाचा आनंद मिळू शकतो का, यावर अनेक मतमतांतरं आहेत. वाचनाची खरीखुरी अनुभूती घेण्यासाठी काहींना हातात प्रत्यक्ष पुस्तक असावंसं वाटतं. पण, जगभरात अनेक मंडळींना या ऑडिओ बुक्समुळे हा आनंद अधिक चांगल्या पद्धतीनं घेता आल्याचंही दिसून येतं. ऑडिओ बुक्समुळे एरवीपेक्षा अधिक पुस्तकांचा आस्वाद घेता येतो. त्याचबरोबर, जी व्यक्ती तुम्हाला पुस्तक वाचून दाखवत असते, तिच्यामुळे तुमचा त्या पुस्तकाबरोबरचा प्रवास अधिक रंजक होऊ शकतो. इतर भाषांबरोबरच मराठीतही अनेक ऑडिओ बुक्स सध्या उपलब्ध आहेत. थोरा-मोठ्यांच्या कादंबऱ्यांपासून नवोदित लेखकांच्या लघुकथांपर्यंत अनेक पर्याय खुले झाले आहेत. विशेष म्हणजे अनेक सेलेब्रिटी मंडळी या पुस्तकांना आपला आवाज देत आहेत. त्यामुळे ही पुस्तकं ऐकण्याचा अनुभव अधिकाधिक संस्मरणीय होत असल्याचं सांगितलं जात असून, तरुणाईकडून या ऑडिओ बुक्सना चांगला प्रतिसाद मिळत आहे. मराठी ऑडियो बुक्ससाठी आवाज देणारे लेखक-कलाकार मृण्मयी गोडबोले, आलोक राजवाडे, विराजस कुलकर्णी, मृणाल कुलकर्णी, दिग्पाल लांजेकर,अजय पुरकर, शिवराज वायचळ, तृप्ती खामकर, नचिकेत देवस्थळी, संदिप खरे, शुभांगी दामले, दिलीप प्रभावळकर, उर्मिला निंबाळकर, प्रतीक्षा लोणकर, अरुणा ढेरे, उदय सबनीस, विश्वास नांगरे पाटील, श्रीरंग देशमुख, तुषार दळवी, परी तेलंग, अंगद म्हसकर, स्वानंदी टिकेकर, प्रसाद फणसे.

from Career News in Marathi: Career News, मराठी Career बातम्या | Maharashtra Times https://ift.tt/3eIsmu5
via IFTTT