बँकॉकमध्ये अडकलेल्या विद्यार्थ्यांना परतीची ओढ

म. टा. वृत्तसेवा, मालेगाव करोनाने जगात थैमान घातले असून, खबरदारी म्हणून देशातील विमान वाहतूक पूर्णतः बंद आहे. याचा फटका राज्यातील चार विद्यार्थ्यांना बसला आहे. बँकॉक (थायलंड) येथे हॉटेल मॅनेजमेंट प्रशिक्षण घेण्यासाठी गेलेले हे चौघेही तेथेच अडकले आहेत. यात मालेगाव तालुक्यातील दोन, धुळे जिल्ह्यातील एक व वर्धा जिल्ह्यातील एकाचा समावेश आहे. बँकॉक येथील महाराष्ट्र मंडळ व मालेगावातील प्रसाद इन्स्टिट्यूट ऑफ हॉटेल मॅनेजमेंट कॉलेज यांच्या सहकार्याने सुरक्षित राहण्याची व्यवस्था झाली असली तरी भारतातील परतीचा मार्ग खुला व्हावा अशी त्यांची मागणी आहे. मालेगाव तालुक्यातील ऋषिकेश भरत बच्छाव (रा. सोयगाव, मालेगाव जि. नाशिक) व दीपक रमेश अहिरे(रा. हाताने, ता. मालेगाव जि. नाशिक) हे दोघे व साक्री येथील संदीप भिकनसिंग निकुंभ (रा. रायते, ता. साक्री जि. धुळे) असे तिघे मालेगावातील प्रसाद इन्स्टिट्यूट ऑफ हॉटेल मॅनेजमेंट कॉलेजचे विद्यार्थी आहेत, तर कुणाल संजयराव मानकर (रा. वर्धा) हा वर्धा येथील कॉलेजचा विद्यार्थी आहे. हॉटेल मॅनेजमेंट अभ्यासक्रमाचा भाग म्हणून सहा महिन्याच्या प्रशिक्षणासाठी हे चौघे जानेवारी २०२० मध्ये बँकॉक येथे गेले होते. प्रशिक्षण पूर्ण करून ते जुलै महिन्यात परत येऊ शकले असते. मात्र, त्याआधीच करोनाचे संकट आल्याने त्यांना प्रशिक्षण अर्धवट सोडावे लागले व बँकॉक विमानतळ गाठावे लागले. दरम्यान, भारतात वाढत गेल्याने विमान वाहतूक थांबली व ते अडकले. अखेर तेथील महाराष्ट्र मंडळाने त्यांना आश्रय दिल्याने भारतात असलेल्या त्यांच्या पालकांना व विद्यार्थ्यांना दिलासा मिळाला. परंतु, भारतात परत येण्यासाठी त्यांना आता धडपड करावी लागत आहे. करोनाचे संकट वाढतच असल्याने येथे त्यांचे पालकदेखील चिंतेत सापडले आहेत. सोशल मीडियाद्वारे त्यांनी केंद्र व राज्य सरकारकडे मदत मागितली आहे. अद्याप तरी त्यांना मदत मिळू शकलेली नाही. बँकॉकमध्ये सुरक्षित असलो तरी आम्हाला भारतात येण्यासाठी मदत मिळावी अशी मागणी मालेगाव येथील ऋषिकेश बच्छाव याने 'मटा'शी बोलताना केली. आर्थिक अडचणी असतानाही मुलाला बँकॉक येथे प्रशिक्षणासाठी पाठवले होते. करोनाच्या संकटामुळे मात्र सगळेच बिघडले आहे. मुलगा अडकल्याने आम्हाला चिंता वाटत आहे. त्यांना सुखरूप भारतात परत आणावे हीच आमची मागणी आहे. - भरत बच्छाव, ऋषिकेशचे वडील

from Career News in Marathi: Career News, मराठी Career बातम्या | Maharashtra Times https://ift.tt/3ahmogo
via IFTTT