करोना: गरजू विद्यार्थ्यांच्या घरी शिधा वाटप

म. टा. वृत्तसेवा नाशिकरोड शिक्षकाचे कर्तव्य केवळ शाळेच्या चार भिंतींच्या आत केवळ खडू आणि फळा इतकेच मर्यादित नसते. वर्षभर ज्ञानदानाच्या माध्यमातून आपल्या विद्यार्थ्यांची वैचारिक भूक भागविणे एवढ्यापुरतेही मर्यादित नसल्याचे नाशिकरोड येथील नाशिक शिक्षण प्रसारक मंडळाच्या पुरुषोत्तम इंग्लिश स्कूलमधील शिक्षकांनी करोनामुळे लॉकडाऊनच्या काळात रोजगार बुडालेल्या पालकांना स्वखर्चाने शिधा पुरवून आपल्या विद्यार्थ्यांच्या मुखी घास भरवून सिद्ध केले आहे. लॉकडाऊनच्या कालावधीत संपूर्ण व्यवसाय, उद्योगधंदे बंद असल्याने नागरिकांचे रोजगारदेखील अडचणीत आले आहेत. नेहमी आजूबाजूला बागडणारे विद्यार्थ्यांची त्यांच्या पालकांचा रोजगार बुडाल्याने पोटभर जेवण मिळण्याची अडचण दूर करण्यासाठी संस्था कार्यकारिणी सदस्य सुभाष पवार, संजय चव्हाण, भरत भालेराव या शिक्षकांनी प्राचार्य दिलीप वाणी यांच्यापुढे मदत करण्याची इच्छा व्यक्त केली. शाळेतील सर्व शिक्षकांना या परिस्थितीची माहिती व्हॉट्स अॅपद्वारे देताच तब्बल ५१ शिक्षक आपल्या गरीब विद्यार्थ्यांच्या ताटात दोन घास वाटा देण्यासाठी पुढे आले. या सर्व शिक्षकांनी केलेल्या मदतीतून ६४ हजार ७०० रुपयांची वर्गणी जमा झाली. एका शेतकऱ्याला या उपक्रमाची माहिती मिळताच त्यांनी नाव गुप्त ठेवण्याच्या अटीवर या शिक्षकांकडे एक क्विंटल गहू सोपवून या दानाच्या यज्ञात आपला वाटा उचलला. संस्थेने देखील या उपक्रमाचे कौतुक करून आर्थिक मदत देवू केली. ---- विद्यार्थ्यांचे चेहरे आनंदाने फुलले वर्गशिक्षकांकडून ८४ गरजू विद्यार्थ्यांची नावे पुढे आली. सिन्नर फाटा, दसक, पंचक, ओढा रोड, अरिंगळे मळा, सामनगाव रोड, चेहेडी पंपिंग स्टेशन, जयभवानी रोड, भोर मळा, नाशिककर मळा या भागातील गरीब कुटुंबांतील विद्यार्थ्यांच्या घरी जावून या शिक्षकांनी शिधा पोहोच केला. दररोज अभ्यासासाठी दरडावणाऱ्या, रागावणाऱ्या आपल्या शिक्षकांच्या मनात आपल्या कुटुंबाप्रती असलेला करुणेचा भाव बघून या विद्यार्थ्यांचे चेहरे आनंदाने फुलले तर काहींना गहिवरून देखील आले.

from Career News in Marathi: Career News, मराठी Career बातम्या | Maharashtra Times https://ift.tt/2Vmyvoh
via IFTTT