पदवी परीक्षा रद्द करा; मागणीसाठी विद्यार्थ्यांच्या ऑनलाइन याचिका

मुंबई: महाराष्ट्रातील विद्यार्थ्यांनी पदवीच्या अखेरच्या वर्षाच्या परीक्षा उच्च व तंत्र शिक्षण विभागाने रद्द कराव्या अशी मागणी लावून धरली आहे. विद्यार्थ्यांनी ऑनलाइन याचिका केल्या आहेत. या याचिकांना सुमारे ५० हजार लोकांनी पाठिंबा दिला आहे. उच्च आणि तंत्र शिक्षण मंत्री उदय सामंत यांनी अलीकडेच परीक्षांबाबत घोषणा केली होती. त्यानुसार महाराष्ट्रातील सर्व विद्यापीठे आणि संलग्न महाविद्यालयांमधील पदवी, पदव्युत्तर अभ्यासक्रमांच्या केवळ अंतिम वर्षांच्या परीक्षा होणार आहेत. अन्य सर्व विद्यार्थ्यांना त्यांच्या शैक्षणिक कामगिरीनुसार मूल्यांकन करून पुढील वर्गात प्रमोट करण्यात येणार आहे. मात्र राज्यातल्या कोविड -१९ मुळे निर्माण झालेल्या स्थितीत परीक्षा देणे धोकादायक असल्याचे सांगत पदवीचे विद्यार्थी परीक्षांना सातत्याने विरोध करीत आहेत. जे विद्यार्थी आतापर्यंतच्या सर्व सेमिस्टरचा नीट अभ्यास करून अंतिम वर्षापर्यंत आले आहेत, त्यांना परीक्षा द्यायला सांगणे आणि ज्यांनी नुकते पदवीचे शिक्षण सुरू केले आहे त्यांना प्रमोट करणे हे योग्य नाही, असे या विद्यार्थ्यांचे म्हणणे आहे. कोविड - १९ महामारी मुळे उद्भवलेल्या स्थितीमुळे विद्यार्थ्यांवर असलेला ताण, त्यांची मानसिक आणि शारीरिक सुरक्षितता, करोना संक्रमणाचा धोका आदी सर्व गोष्टी लक्षात घेऊन पदवीच्या अंतिम वर्षाच्या परीक्षाही रद्द कराव्यात अशी विद्यार्थ्यांची मागणी आहे. ऑफलाइन परीक्षा घेतल्या तर परीक्षा केंद्रांपर्यंत जाण्याची गैरसौय आणि ऑनलाइन परीक्षा घेतल्या तर ऑनलाइन साधनांचा तुटवडा असताना परीक्षा घेण्याचा अट्टाहास करू नये असं त्यांचं म्हणणं आहे. विद्यार्थ्यांनी पाच ते सात सेमिस्टर परीक्षा दिलेल्या आहेत. त्यामुळे त्यांचे त्या आधारे मूल्यांकन करावे अशी विद्यार्थ्यांची मागणी आहे.

from Career News in Marathi: Career News, मराठी Career बातम्या | Maharashtra Times https://ift.tt/3dUtBVN
via IFTTT