शुल्क मागणाऱ्या शाळांवर कारवाई; शासनाचे निर्देश

म. टा. विशेष प्रतनिधी, मुंबई लॉकडाउनच्या काळात पालकांकडून शुल्क मागणाऱ्या शाळांवर कारवाई करण्यात येईल, असा निर्णय शासनाने जाहीर केला आहे. ज्या पालकांनी मागील शैक्षणिक वर्षाचे शुल्क पूर्ण भरलेले नाही, त्यांच्यामागे तगादा लावू नये, असेही या आदेशात म्हटले आहे. यामुळे वेतन जमा न झाल्याने शाळांचे शुल्क कसे भरायचे याबाबत चिंतेत असलेल्या पालकांना दिलासा मिळाला आहे. लॉकडाउनच्या काळात अनेक शाळा पालकांना एमएसएस करून शुल्क भरण्याची विनंती करत आहेत. काही शाळांनी ऑनलाइन अभ्यासाचा धडाका पालकांच्या मोबाइलवर सुरू केला आहे. त्या निमित्ताने शुल्क भरा, अशा सूचनाही शाळा करीत आहे. याविरोधात पालक संघटनांनी एकत्र येऊन यासंदर्भातील निवेदनेही सरकारला दिली होती. या पार्श्वभूमीवर सरकारने हा शासन निर्णय जाहीर केला आहे. शैक्षणिक वर्ष २०२०-२१साठी कोणतीही शुल्क वाढ करू नये, अशा सूचना देण्यात आल्या आहेत. शैक्षणिक वर्ष २०१९-२० व २०२०-२१ मधील देय आणि शिल्लक वार्षिक शुल्क एकदाच न घेता मासिक किंवा त्रैमासिक जमा करण्याचा पर्याय पालकांना द्यावा, शैक्षणिक वर्ष २०२०-२१ साठी जर काही शैक्षणिक सुविधांचा वापर करावा लागला नाही व त्याबाबतचा खर्च कमी होणार असल्यास पालकांच्या कार्यकारी समितीमध्ये ठराव करून त्याप्रमाणे शिक्षण संस्थांनी योग्य प्रमाणात शुल्क कमी करावे असेही स्पष्ट केले आहे. हे आदेश सर्व बोर्डाच्या सर्व माध्यमांच्या पूर्व प्राथमिक ते बारावीपर्यंत विद्यार्थ्यांसाठी लागू असतील.

from Career News in Marathi: Career News, मराठी Career बातम्या | Maharashtra Times https://ift.tt/2YHQQhI
via IFTTT