दहावी-बारावी फेरपरीक्षा लवकर नाही? नापासांचे वर्ष वाया जाणार

SSC-HSC ReExam: महाराष्ट्र राज्य माध्यमिक आणि उच्च माध्यमिक शिक्षण मंडळाकडून फेब्रुवारी-मार्च महिन्यात घेण्यात आलेल्या दहावी-बारावीच्या परीक्षेत अनुत्तीर्ण विद्यार्थ्यांसाठी यंदा फेरपरीक्षा होण्याची शक्यता धूसर आहे. अनुत्तीर्ण विद्यार्थ्यांचे वर्ष वाया जाऊ नये, म्हणून गेल्या काही वर्षांपासून ही परीक्षा जुलै-ऑगस्टमध्ये घेण्यात येते. मात्र, यंदा करोनाच्या प्रादुर्भावामुळे या परीक्षा होण्याची शक्यता कमी आहे. दहावी-बारावीच्या परीक्षेत अनुत्तीर्ण झालेल्या विद्यार्थ्यांचे शैक्षणिक वर्ष वाया जाऊ नये, विनोद तावडे शिक्षणमंत्री असतांना, त्यांनी ऑक्टोबरमध्ये होणारी फेरपरीक्षा जुलै-ऑगस्टमध्ये घेण्याचा निर्णय घेतला. त्यानुसार जुलै २०१५ पासून फेरपरीक्षा घेण्यात येते. या परीक्षेत उत्तीर्ण होणाऱ्या विद्यार्थ्यांना उच्चशिक्षणाची संधी मिळते. मात्र, यंदा करोनाच्या प्रादुर्भावामुळे राज्य सरकारने विद्यापीठांच्या परीक्षा रद्द करण्याचा निर्णय घेतला आहे. तर, राज्य मंडळाचा बारावीचा निकाल दीड महिने उशिरा जाहीर झाला. तर, दहावीचा निकाल जुलै अखेर जाहीर होण्याची शक्यता आहे. त्यातच करोनाचा प्रादुर्भाव ऑगस्ट महिन्यात कायम राहण्याची शक्यता वर्तविण्यात आली आहे. त्यामुळे ऑगस्टमध्ये ही परीक्षा घेणे शक्य नाही. यंदा मंडळाने जाहीर केलेल्या प्रसिद्धी पत्रकात देखील या परीक्षांबाबत उल्लेख नाही. त्यामुळे या परीक्षा पुन्हा ऑक्टोबर होण्याची शक्यता असून, शैक्षणिक वर्षाची सुरुवात झाल्याने त्या परीक्षेत उत्तीर्ण होणाऱ्या विद्यार्थ्यांना उच्चशिक्षणाची संधी मिळणार नाही. त्यामुळे यंदा अनुत्तीर्ण विद्यार्थ्यांचे वर्ष वाया जाण्याची शक्यता आहे. याबाबत, मंडळाच्या अधिकाऱ्यांशी चर्चा केली असता, त्यांनी याबाबत काहीच सांगता येणार नाही, अशी प्रतिक्रिया दिली. जुलैअखेर दहावीचा निकाल राज्य मंडळाचा साधारण दहावीचा निकाल जाहीर झाल्यावर, आठ ते दहा दिवसांत दहावीचा निकाल जाहीर होतो. मात्र, यंदा करोनाच्या प्रादुर्भावामुळे उत्तरपत्रिका तपासणीचे काम रखडले. त्यामुळे दहावीचा निकाल जुलैअखेरपर्यत लागण्याची शक्यता आहे, असे मंडळाकडून सांगण्यात आले.

from Career News in Marathi: Career News, मराठी Career बातम्या | Maharashtra Times https://ift.tt/2ZBe1u4
via IFTTT