IIM लखनऊचा विद्यार्थ्यांना झटका; ३५ टक्के फीवाढ

इंडियन इन्स्टिट्यूट ऑफ मॅनेजमेंट (आयआयएम) लखनऊने आपल्या व्यवस्थापन विषयातील दोन वर्षांच्या पोस्ट ग्रॅज्युएट अभ्यासक्रमाचे शुल्क वाढवले आहे. संस्थेने या अभ्यासक्रमाच्या शुल्कात ३६ टक्के वाढ केली आहे. २०१९-२० या सत्रासाठी हे शुल्क १४ लाख रुपये होते. ते आता वाढवून १९ लाख रुपये करण्यात आले आहे. ही केवळ नव्या विद्यार्थ्यांना लागू होईल. जे विद्यार्थी पीजीच्या दुसऱ्या वर्षाला आहेत, त्यांच्यासाठी ही फीवाढ नाही. त्यांना जुन्या रचनेनुसारच शुल्क भरायचे आहे. करोनाव्हायरसच्या संसर्गामुळे लोकांवर आर्थिक बोजा वाढत असल्याने काही विद्यार्थ्यांनी या अचानक करण्यात आलेल्या फी वाढीबाबत नाराजी व्यक्त केली आहे. आपली तक्रार मांडण्यासाठी विद्यार्थ्यांनी अधिकाऱ्यांना पत्र लिहिले आहे. एका विद्यार्थ्याने नाव न देण्याच्या अटीवर सांगितले की, 'कोविड - १९ संक्रमण काळात मधील फी ३६ टक्क्यांनी वाढवणे ही प्रशासनाची बेजबाबदार कृती दर्शवते. यावर्षी शुल्क कोणत्याही प्रकारे वाढवू नये अशा अनेक सूचना शासनाकडून देण्यात आल्या असून या शैक्षणिक वर्षात अनेक आयआयएमनी शुल्क वाढ न करण्याचा निर्णय घेतला आहे. असे असूनही आयआयएम लखनऊमध्ये एवढी प्रचंड शुल्कवाढ करण्यात आली आहे.' हेही वाचा: संस्थेच्या म्हणण्यानुसार, '२०२० पासून सुरू होणाऱ्या बॅचची फी वाढविण्याचा निर्णय अचानक घेण्यात आलेला नाही. हा निर्णय जून २०१९ मध्ये झालेल्या बोर्डाच्या बैठकीत घेण्यात आला होता. कारण पुढील वर्षीची प्रवेश प्रक्रिया सुरू होण्याच्या खूप आधी हा निर्णय घेण्यात येतो. संस्थेच्या वतीने एज्युकेशन टाईम्सला दिलेल्या अधिकृत निवेदनात म्हटले आहे की, 'या शुल्कवाढीनंतरही आयआयएम लखनऊचे शुल्क एनआयआरएफ क्रमवारीत येणाऱ्या चार आयआयएमच्या फीपेक्षा खूपच कमी आहे. आयआयएम लखनऊने २०१३ मध्ये शुल्क १० टक्के वाढवले होते. तेव्हा १०.८ लाख असलेले शुल्क वाढून १२ लाख झाले होते. त्यानंतर २०१६ मध्ये शुल्क वाढवून १४ लाख करण्यात आले. आता चार वर्षांनंतर फीवाढ होऊ घातली आहे. एनआयआरएफ क्रमवारीत व्यवस्थापन संस्थांच्या विभागात पहिल्या दोन आयआयएम, बंगळूरु आणि अहमदाबादच्या दोन वर्षांच्या पीजीपी कार्यक्रमाची फी सुमारे २३ लाख रुपये आहे.'

from Career News in Marathi: Career News, मराठी Career बातम्या | Maharashtra Times https://ift.tt/3e3OgGX
via IFTTT