जेईई / नीट परीक्षा नियोजित वेळेतच; सर्वोच्च न्यायालयाने याचिका फेटाळली

नवी दिल्ली: मेन आणि नीट या अनुक्रमे अभियांत्रिकी आणि वैद्यकीय अभ्यासक्रमांच्या परीक्षा कोविड -१९ महामारी काळात लांबणीवर टाकाव्यात, अशी मागणी करणाची याचिका सर्वोच्च न्यायालयाने फेटाळून लावली. कोविड - १९ संसर्ग काळातही जीवन जगत राहायला हवे. परीक्षा कशा थांबवता येतील, अशी टिप्पणी न्या. अरुण मिश्रा यांनी केली. दरम्यान, परीक्षा योग्य खबरदारीसह आयोजित करण्यात येतील अशी हमी नॅशनल टेस्टिंग एजन्सीच्या वतीने महाधिवक्त तुषार मेहता यांनी न्यायालयाला दिली. एनटीएच्या ३ जुलैच्या परिपत्रकानुसार जेईई मेन परीक्षा १ ते ६ सप्टेंबर रोजी तर नीट यूजी २०२० परीक्षा १३ सप्टेंबर २०२० रोजी होणार आहे. न्या. अरुण मिश्रा, न्या. बी.आर.गवई आणि न्या. कृष्ण मुरारी यांच्या खंडपीठाने ही सुनावणी घेतली. 'कोविडची परिस्थिती काय आहे हे आयोजकांना माहित नाही असं तुम्ही कसं गृहित धरू शकता,' असा सवाल न्या. अरुण मिश्रा यांनी याचिकाकर्त्यांना विचारला. 'कोविड-१९ वरील लस लवकरच येणार आहे. स्वत: पंतप्रधान नरेंद्र मोदी यांनी १५ ऑगस्ट रोजी देशाला उद्देशून केलेल्या भाषणात ही माहिती दिली आहे. त्यामुळे किमान तोपर्यंत तरी या परीक्षा पुढे ढकलाव्यात. परीक्षा अनिश्चित काळासाठी पुढे ढकला, अशी आमची मागणी नाही,' अशी विनंती याचिकाकर्ते अॅड. अलख यांनी कोर्टाला केली. मात्र कोर्टाने याचिका फेटाळली. ही याचिका ६ ऑगस्ट रोजी दाखल करण्यात आली होती. ११ विविध राज्यांमधील ११ विद्यार्थ्यांनी ही याचिका दाखल केली आहे. नॅशनल टेस्टिंग एजन्सीने ३ जुलै रोजी एका जाहीर निवेदनाद्वारे परीक्षेच्या तारखा जाहीर केल्या. हे प्रसिद्धी पत्रक रद्द करण्याची मागणी याचिकाकर्त्यांनी केली होती. देशभरात कोविड - १९ ची परिस्थिती सामान्य झाल्यानंतरच जेईई आणि नीट परीक्षांचे आयोजन करण्यास केंद्र सरकारला निर्देश द्यावेत, अशी मागणीही याचिकेत करण्यात आली होती.

from Career News in Marathi: Career News, मराठी Career बातम्या | Maharashtra Times https://ift.tt/3g10qkz
via IFTTT