श्रीलंकेतील शाळा पूर्णपणे उघडल्या

कोलंबो: करोना विषाणूमुळे पुकारण्यात आलेल्या लॉकडाऊनमुळे सुमारे चार महिने बंद असलेल्या श्रीलंकेतील सर्व नियमित सोमवारी सुरू झाल्या. श्रीलंकेत पहिला कोविड- १९ रुग्ण मार्च महिन्याच्या मध्यावर आढळला होता. त्यानंतर तेथे लॉकडाऊन पुकारण्यात आला होता. जुलै महिन्यात काही ठराविक इयत्तांच्या शाळा सुरू झाल्या होत्या, पण करोना संक्रमण पुन्हा वाढल्याने त्या काही दिवसांतच बंद करण्यात आल्या. आता पुन्हा १० ऑगस्टपासून त्या सुरू करण्यात आल्या आहेत. 'सर्व शाळा आजपासून सुरू झाल्या आहेत. प्रत्येक इयत्ता टप्प्याटप्याने सुरू होतील,' असं शिक्षण सचिव एनएचएम चित्रनंदा म्हणाले. २०० विद्यार्थ्यांपेक्षा कमी विद्यार्थीसंख्या असलेल्या शाळा लॉकडाऊनपूर्वी जशा सुरू होत्या तशाच नियमितपणे सुरू होतील. वर्गात मुलांमध्ये एक मीटरचं अंतर ठेवून या शाळा सुरू होतील. मात्र जेथे २०० पेक्षा जास्त विद्यार्थी आहेत, त्या शाळांचे वर्ग इयत्तानिहाय वेगवेगळ्या दिवशी सुरू राहतील. याबाबत आरोग्य मंत्रालयाच्या दिशानिर्देशांचे पालन केले जाईल, असे चित्रनंदा म्हणाले. शाळांच्या कॅन्टीन तूर्त बंद राहतील. आरोग्य विभागाकडून कोविड - १९ विषाणू संसर्ग पूर्णत: नियंत्रित झाल्याशिवाय कॅन्टीन उघडायला परवानगी नसेल. देशात कोविड - १९ विषाणूचे कम्युनिटी संक्रमण पूर्णपणे नियंत्रणात आले असल्याने शाळा उघडण्याचा निर्णय घेण्यात आला. ३० एप्रिल पासून श्रीलंकेत करोनाची एकही कम्युनिटी केस नाही. मात्र करोनाचा धोका अद्यापही पूर्णपणे टळलेला नाही, असं आरोग्य विभागाचं म्हणणं आहे. श्रीलंकेत अद्यापपर्यंत २,८४४ करोना संक्रमित रुग्णांची नोंद झाली. यापैकी २,५७९ रुग्ण बरे झाले तर ११ जणांचा मृत्यू झाला.

from Career News in Marathi: Career News, मराठी Career बातम्या | Maharashtra Times https://ift.tt/33GpVFz
via IFTTT