NEET UG वेळेतच; आणखी एक याचिका सुप्रीम कोर्टाने फेटाळली

परीक्षा पुढे ढकलण्याची मागणी करणारी नवी याचिका सर्वोच्च न्यायालयाने बुधवारी फेटाळून लावली. ही परीक्षा नियोजित वेळापत्रकानुसार रविवारी १३ सप्टेंबर रोजी होणार आहे. अॅड. अलख आलोक श्रीवास्तव यांनी ही याचिका दाखल केली होती. परीक्षा पुढे ढकलावी या मागणीसोबतच अन्य काही मागण्याही करण्यात आल्या होत्या. परीक्षा झालीच तर जास्त परीक्षा केंद्रे असावीत आणि परीक्षा एका दिवसाऐवजी पाच ते सहा दिवसांमध्ये विभागून आयोजित करावी अशी याचिकाकर्त्यांची मागणी होती. या याचिकेवर बुधवारी सकाळी सुनावणी झाली. न्या. अशोक भूषण यांच्या नेतृत्वाखालील खंडपीठाने सुनावणी घेत ही याचिका फेटाळली. वैद्यकीय पदवी अभ्यासक्रमांच्या प्रवेशांसाठी देशभर नॅशनल एलिजिबिलिटी कम एन्ट्रन्स टेस्ट (NEET) ही एकमेव परीक्षा आयोजित केली जाते. यंदा देखील १६ लाखांवर विद्यार्थी ही परीक्षा देत आहेत. मात्र विद्यार्थ्यांच्या तुलनेत परीक्षा केंद्रांची संख्या कमी आहे. बिहारसारख्या राज्यात केवळ दोन परीक्षा केंद्रे आहेत. करोना महामारीचा काळ सुरू आहे. ट्रेन सेवा पूर्ववत नाही. असे असताना परीक्षा किमान ३ आठवडे पुढे ढकलावी, असा युक्तीवाद याचिकाकर्त्यांचे वकिल अॅड. अरविंद पी. दातार यांनी केला होता. मात्र नॅशनल टेस्टिंग एजन्सीने सर्व खबरदारीसह परीक्षांची तयारी केली असल्याचे सांगत न्यायालयाने ही याचिका फेटाळून लावली. तत्पूर्वी, १७ ऑगस्ट रोजी देखील न्या. अरुण मिश्रा यांच्या नेतृत्वाखालील खंडपीठाने नीट परीक्षांच्या स्थगितीची मागणी करणाऱ्या याचिका फेटाळल्या होत्या.

from Career News in Marathi: Career News, मराठी Career बातम्या | Maharashtra Times https://ift.tt/2Ff9Qwx
via IFTTT