गोंडवाना विद्यापीठाच्या पहिल्याच पेपरला तांत्रिक बाधा

म. टा. वृत्तसेवा, गडचिरोली गोंडवाना विद्यापीठाचा पहिल्या सत्रातील सोमवारी सकाळी ९ वाजता होणारा पेपर तांत्रिक अडचणींमुळे पुढे ढकलण्यात आला आहे. आता दुपारी २ वाजता ही परीक्षा घेतली जाणार आहे. अंतिम वर्षांच्या विविध १०५ अभ्यासक्रमासाठी गोंडावाना विद्यापीठाशी संलग्न असलेल्या गडचिरोली आणि चंद्रपूर जिल्ह्यातील २१२ महाविद्यालयांमधील १८,५०० विद्यार्थी ही परीक्षा देत आहेत. विद्यार्थ्यांना ग्रुप ऑनलाइन परीक्षा द्यायची होती. सोबतच ११ ठिकाणी ऑफलाइन सेंटर सुरू करण्यात आले होते. सकाळी ९ ते १.१५ वाजतादरम्यान पहिला पेपर होणार होता. मात्र पहिल्याच पेपरला अनेक ठिकाणी इंटरनेटची तांत्रिक अडचण निर्माण झाली. बहुतांश विद्यार्थ्यांना पेपर सोडविण्यासाठी लॉगइन करता आले नाही. सर्व्हर सुरू झाल्याचे न दिसून आल्याचे अनेक विद्यार्थ्यांनी मोबाइवरून कळविले होते. सिरोंचा तालुक्यात मोबाइल कनेक्टिव्हिटीचा त्रास असल्याने ऑफलाइन सेंटरची मागणी करण्यात आली होती. ऑनलाइन परीक्षेलाच परवानगी असल्याने दुर्गम भागातील गावांमध्ये वायफायची सुविधा उपलब्ध करून देण्यात आली. विद्यार्थी सकाळपासून तिथे येऊन बसले होते. नियमांचे पालनही करण्यात आले. पण, विद्यार्थ्यांना लॉगइन करता न आल्याने अडचण वाढली. सर्वत्र एकच तक्रार असल्याने सकाळच्या सत्रातील पेपर दुपारी घेण्याचा निर्णय विद्यापीठ प्रशासनाने घेतला आहे.

from Career News in Marathi: Career News, मराठी Career बातम्या | Maharashtra Times https://ift.tt/30u68Xt
via IFTTT