८४ टक्के विद्यार्थ्यांनी दिली आयडॉलची तृतीय वर्ष बीए व बीकॉम परीक्षा

2020 : मुंबई विद्यापीठाच्या दूर व मुक्त अध्ययन संस्थेच्या तृतीय वर्ष बीए व बीकॉमच्या आज झालेल्या पेपरची परीक्षा यशस्वीरीत्या संपन्न झाली. आज झालेल्या या दोन्ही परीक्षेमध्ये ४२०२ म्हणजे दोन्ही परीक्षेत मिळून ८४.०७ % विद्यार्थ्यांनी ऑनलाईन परीक्षा दिली. आजच्या परीक्षेमध्ये कोणतीही तांत्रिक अडचण आलेली नाही. सकाळी झालेल्या बीएच्या परीक्षेमध्ये ३०४९ विद्यार्थी तर दुपारी झालेल्या बीकॉमच्या परीक्षेत ११५३ विद्यार्थ्यांनी हि परीक्षा दिली आहे. आज सकाळी तृतीय वर्ष बीएच्या १४ विषयामध्ये परीक्षा घेण्यात आली. यामध्ये ३७०७ विद्यार्थ्यांपैकी ३०४९ विद्यार्थ्यांनी हि ऑनलाईन परीक्षा दिली. बीएमध्ये ८२ % विद्यार्थ्यांनी हि परीक्षा दिली आहे. तर दुपारी बीकॉमचा उपयोजित समूहाचा एक विषय होता. यामध्ये १२९१ विद्यार्थ्यांपैकी ११५३ विद्यार्थ्यांनी परीक्षा दिली. बीकॉममध्ये ८९.३१ % विद्यार्थ्यांनी हि परीक्षा दिली आहे. परीक्षेच्या यशासाठी विद्यापीठाने केली तयारी या परीक्षेच्या यशासाठी विद्यापीठाने दि. २० ते २५ ऑक्टोबरपर्यंत सहा वेळेस ८०५४ विद्यार्थ्यांची सराव परीक्षा घेण्यात आली होती. राहिलेल्या विद्यार्थ्यांना दूरध्वनीद्वारे प्रत्यक्ष संपर्क साधला. ज्या विद्यार्थ्यांना परीक्षेचे प्रवेशपत्र मिळाले आहे, त्या सर्व विद्यार्थ्यांना एसएमएसवर परीक्षेचा संदेश पाठविला, त्यांच्या ईमेलवर परीक्षेची लिंक पाठविण्यात आली. विद्यार्थ्यांसाठी १० दूरध्वनी असलेली हेल्पलाईन सुरु केली. एखाद्या विद्यार्थ्याकडे परीक्षेचे प्रवेशपत्र असेल पण काही कारणामुळे लिंक गेली नाही तर त्याला हेल्पलाईनवरून लिंक पाठविली गेली. हि हेल्पलाईन सेवा सकाळी ९ ते सायंकाळी ६ पर्यंत उपलब्ध केली गेली. हि हेल्पलाईन मराठी, इंग्रजी व हिंदी भाषेत उपलब्ध करून दिल्यामुळे विद्यार्थ्यांना याचा फायदा झाला. विद्यार्थ्यास तांत्रिक सुलभता कॅमेरा असलेल्या कोणत्याही स्मार्टफोनवर, लॅपटॉप किंवा डेक्सटॉप कॉम्प्युटरवर हि परीक्षा देऊ केली. तसेच एकाच वेळेस सर्व विद्यार्थ्यांनी परीक्षेसाठी लॉगिन करू नये म्हणून परीक्षेसाठी चार तासाच्या वेळेचा स्लॉट दिला गेला यामुळे परीक्षा देण्यासाठी एकाच वेळी विद्यार्थ्यांनी गर्दी केली नाही. विद्यार्थ्यांनी त्यांच्या सोयीनुसार परीक्षेसाठी एक तास निवडला.यामुळे विद्यार्थ्यांची विभागणी झाली व परीक्षा व्यवस्थितरित्या पार पडली. विद्यार्थ्यास ऑनलाईन सहाय्यता देखील उपलब्ध करून दिली.

from Career News in Marathi: Career News, मराठी Career बातम्या | Maharashtra Times https://ift.tt/35z8GFx
via IFTTT