IIT Delhi 51st Convacation: पंतप्रधान मोदींनी विद्यार्थ्यांना दिले ४ मंत्र

51st Convacation: आयआयटी दिल्लीने शनिवारी आपला ५१ वा वार्षिक दीक्षांत सोहळा (51st Annual Convocation Ceremony) साजरा केला. पंतप्रधान नरेंद्र मोदी यांनी यावेळी व्हिडिओ कॉन्फरन्सिंगच्या माध्यमातून विद्यार्थ्यांना संबोधित केले. आज संस्थेने पीएचडी, एम.टेक सह मास्टर ऑफ डिझाइन, एमबीए आणि बी.टेक विद्यार्थ्यांसह १५०० हून अधिक पदवीधर विद्यार्थ्यांना पदवी प्रदान केली. या सोहळ्याच्या वेळी दिलेल्या भाषणात पंतप्रधान मोदी यांनी विद्यार्थ्यांना आत्मनिर्भर भारत आणि नाविन्यतेवर भर देण्याचा संदेश दिला. पंतप्रधान मोंदींचे भाषण संपूर्णपणे करोना महामारी आणि त्यामुळे जगापुढे उभे ठाकलेल्या संकटावर आधारलेलं होतं. दीक्षांत समारंभासाठी पंतप्रधान मोदींसह शिक्षणमंत्री रमेश पोखरियाल निशंक आणि शिक्षण राज्यमंत्री संजय धोत्रे हेदेखील उपस्थित होते. मोदी म्हणाले, 'कोविड-१९ ने जगाला एक गोष्ट शिकवली ती म्हणजे जागतिकीकरण महत्त्वाचे आहेच, पण सोबतच आत्मनिर्भरतादेखील महत्त्वाची आहे. करोनाच्या संकटकाळात जगात खूप मोठे बदल घडले. पोस्ट कोविड जग खूप वेगळं असेल आणि यात सर्वात मोठी, महत्त्वाची भूमिका तंत्रज्ञानाची राहील.' 'आज देशात तुमच्या गरजा, भविष्यातील आवश्यकता समजून घेऊन एकामागोमाग एक निर्णय घेतले जात आहेत. जुने नियम बदलत आहेत. मला असं वाटतं की मागच्या शतकातील नियम-कायद्यांवर पुढच्या शतकाचे भविष्य ठरू शकत नाही,' असेही मोदी म्हणाले. पंतप्रधान मोदी विद्यार्थ्यांना उद्देशून म्हणाले, 'तुम्ही सर्वांनी JEE सारखी सर्वात कठीण परीक्षा उत्तीर्ण केली आहे. यानंतर आयआयटीत प्रवेश घेतला आहे. तुम्हा सर्वांमध्ये खूप क्षमता आहे, पण दोन गोष्टी आहेत, ज्या तुमची क्षमता आणखी वाढवणार आहेत. एक लवचिकता आणि दुसरी नम्रता.' पंतप्रधान मोदींनी तरुणांना दिले चार मंत्र - तुम्ही आयुष्यात पुढे जाताना कधीही गुणवत्तेशी तडजोड करू नका. - तुमचे नाविन्यपूर्ण उपक्रम मोठ्या प्रमाणावर लोकांच्या उपयोगी येतील, या दृष्टीने काम करा. - विश्वासार्हता ठेवा. बाजारात दीर्घकालीन विश्वासार्हता निर्माण करा. - स्वीकारार्ह व्हा. आयुष्यातील अनिश्चितता आणि बदलांना सामोरे जा.

from Career News in Marathi: Career News, मराठी Career बातम्या | Maharashtra Times https://ift.tt/3k3m2z3
via IFTTT