UGC Guidelines: कॉलेजे सुरू करण्याबाबत यूजीसीचे SOP जारी

Guidelines: विद्यापीठ अनुदान आयोगाने (यूजीसी) गुरुवारी उच्च शिक्षण संस्था सुरू करण्याबाबतची मार्गदर्शक तत्वे जारी केली. महाविद्यालये प्रत्यक्ष सुरू करण्याबाबतचा निर्णय राज्य सरकार, विद्यापीठांचे कुलगुरू यांच्यावर सोपवला आहे. करोनाच्या ताज्या स्थितीनुसार, राज्य सरकारने राज्यातील महाविद्यालये प्रत्यक्ष सुरू करण्याबाबतचा निर्णय घ्यायचा आहे. मात्र, कॉलेज प्रत्यक्ष सुरू झाले तर कोणकोणती खबरदारी घ्यायची याबाबतच्या मार्गदर्शक सूचना यूजीसीने केल्या आहेत. सहा दिवसांचे वेळापत्रक, वर्गाची कमीत कमी संख्या, कॅम्पसमध्ये विलगीकरण व्यवस्था उभारणे, विद्यार्थी, शिक्षक आणि इतर कर्मचाऱ्यांची कोविड-१९ स्क्रीनिंग आदी सूचना केल्या आहेत. करोना विषाणू संसर्गामुळे मार्च महिन्यापासून देशभरातील महाविद्यालये, विद्यापीठे आणि उच्च शिक्षण संस्था बंद आहेत. मात्र, देशातील करोना रुग्णांचे प्रमाण नियंत्रणात येत असल्याने येत्या काळात महाविद्यालये, विद्यापीठे सुरू करण्याच्या दृष्टीने केंद्र सरकारकडून निर्णय घेतला जाऊ शकतो. या पार्श्वभूमीवर यूजीसीने विद्यापीठे, महाविद्यालये सुरू करण्यासाठीची एसओपी प्रसिद्ध केली आहे. संस्थेतील जागेच्या उपलब्धतेनुसार ५० टक्के विद्यार्थ्यांना आलटून-पालटून प्रवेश देण्यासह संसर्ग टाळण्यासाठी सुरक्षित अंतर, मास्कचा वापर, सतत हात धुणे किं वा निर्जंतुक करणे, वर्गखोल्या, सार्वजनिक वापराच्या जागांचे निर्जंतुकीकरण, बाधित आढळल्यास त्यांना विलग करण्यासाठीची व्यवस्था निर्माण करण्याच्या सूचना देण्यात आल्या आहेत. संस्थेत प्रवेश देताना प्रत्येकाच्या शरीराचे तापमान मोजणे, मास्क, सॅनिटायझेशन यंत्रणा उपलब्धतेची तपासणी करणे आवश्यक आहे. ताप, खोकला, श्वास घेण्यास त्रास होत असलेल्यांना प्रवेश देऊ नये. विद्यापीठे, महाविद्यालयांनी नियमित निर्जंतुकीकरणासाठी कार्यप्रणाली निश्चित करावी. संशोधन विद्यार्थी आणि विज्ञान तंत्रज्ञान शाखेतील पदव्युत्तर पदवी विद्यार्थ्यांची संख्या तुलनेने कमी असल्याने आणि अंतराचे नियम पाळणे शक्य असल्याने त्यांना प्रवेश देण्यात येईल. त्याचप्रमाणे शैक्षणिक आणि नोकरीच्या संधींचा विचार करून अंतिम वर्षाच्या विद्यार्थ्यांना बोलावता येईल. ऑनलाइन किंवा दूरस्थ शिक्षण प्रणालीला जास्तीत जास्त प्राधान्य देण्यात यावे, असे यूजीसीकडून स्पष्ट करण्यात आले आहे,. विद्यार्थी, शिक्षक आणि प्रशासनातील कर्मचाऱ्यांना आरोग्य सेतू अ‍ॅप डाऊनलोड करून वापरण्याबाबत प्रोत्साहन देण्याची सूचना करण्यात आली आहे.

from Career News in Marathi: Career News, मराठी Career बातम्या | Maharashtra Times https://ift.tt/3mUwwm0
via IFTTT