शिक्षकांना पुन्हा करावी लागेल करोना चाचणी

म. टा. प्रतिनिधी, औरंगाबाद औरंगाबाद शहरातील शिक्षकांसाठी महापालिकेने करोना चाचणी सक्तीची केली आहे. यापूर्वी शिक्षकांनी चाचणी केली असली तरी आता पुन्हा त्यांना नव्याने चाचणी करावी लागणार आहे, असे महापालिकेच्या आरोग्य वैद्यकीय अधिकारी डॉ. नीता पाडळकर यांनी स्पष्ट केले आहे. शासनाने २३ नोव्हेंबरपासून नववी ते बारावी या वर्गांच्या शाळा, महाविद्यालये सुरू करण्याचा निर्णय जाहीर केला, पण करोना संसर्गाची स्थानिक परिस्थिती लक्षात घेऊन संबंधित जिल्हा आणि शहराच्या प्रशासनाने निर्णय घ्यावा, असेही शासनाने स्पष्ट केले होते. औरंगाबाद महापालिकेचे प्रशासक आस्तिककुमार पांडेय यांनी तीन जानेवारीपर्यंत शाळा सुरू न करण्याचा निर्णय घेतला. या निर्णयाचा आढावा दहा डिसेंबर रोजी करोना संसर्गाचा आढावा घेतला जाईल आणि शाळा सुरू करण्याबद्दलचा नवा निर्णय जाहीर केला जाईल, असे स्पष्ट केले होते. त्यानुसार आढावा घेतल्यानंतर १५ डिसेंबरपासून अकरावी आणि बारावीच्या शाळा (कनिष्ठ महाविद्यालय) सुरू करण्याचा निर्णय त्यांनी जाहीर केला. महापालिका प्रशासकांच्या निर्णयानुसार १५ डिसेंबरपासून (मंगळवार) अकरावी-बारावीचे वर्ग सुरू झाले. त्यासाठी शिक्षकांना पुन्हा करोना चाचणी करण्यास सांगण्यात आले. २३ नोव्हेंबरपासून शाळा सुरू होणार म्हणून शिक्षकांनी 'आरटीपीसीआर' पद्धतीने करोना चाचणी करून घेतली होती. त्यावेळी चाचणी केल्यावर आता पुन्हा चाचणी कशासाठी, असा प्रश्न शिक्षकांकडून विचारला जाऊ लागला. यासंदर्भात महापालिकेच्या आरोग्य वैद्यकीय अधिकारी डॉ. नीता पाडळकर यांना विचारले असता, त्यांनी सांगितले की, यापूर्वी चाचणी केली असली तरी शिक्षकांना नव्याने करोना चाचणी करावीच लागेल. एकदा केलेल्या चाचणीचा अहवाल सात दिवसांपर्यंत ग्राह्य धरला जातो. सात दिवसांनंतर एखाद्याला करोना संसर्ग होऊ शकतो. त्यामुळे आता प्रत्येक शिक्षकाला पुन्हा करोना चाचणी करावीच लागेल. करोना चाचणीसाठी महापालिकेने यापूर्वी १६ ठिकाणे ठरविली होती. त्याच ठिकाणी जाऊन शिक्षकांना चाचणी करून घ्यावी लागेल. या ठिकाणी करता येईल करोना चाचणी - २४ तास सुरू असणारे चाचणी केंद्र - एमआयटी मुलींचे वसतिगृह, सातारा परिसर - ईओसी पदमपुरा - समाज कल्याण मुलांचे वसतिगृह, किलेअर्क - एमजीएम स्पोर्टस् कॉम्प्लेक्स - सिपेट, चिकलठाणा औद्योगिक वसाहत सकाळी दहा ते सायंकाळी सहापर्यंत सुरू असणारी चाचणी केंद्र - आरोग्य केंद्र बायजीपुरा - तापडिया मैदान, अदालत रोड - रिलायन्स मॉल , गारखेडा - महापालिका आरोग्य केंद्र, सिडको एन-११ - आरोग्य केंद्र, राजनगर - सिडको एन-दोन कम्युनिटी सेंटर - महापालिका आरोग्य केंद्र, हर्षनगर - महापालिका आरोग्य केंद्र, चिकलठाणा - महापालिका रुग्णालय, सिडको एन-आठ - महापालिका आरोग्य केंद्र, शिवाजीनगर - छावणी परिषद रुग्णालय

from Career News in Marathi: Career News, मराठी Career बातम्या | Maharashtra Times https://ift.tt/2KdDq89
via IFTTT