आयआयटीत नोकरीसंधी घटल्या; यंदा चार वर्षांतील सर्वात कमी ऑफर

म. टा. विशेष प्रतिनिधी, मुंबई देशभरातील आयआयटीमध्ये डिसेंबर महिन्यात प्लेसमेंट होतात. यंदा या प्लेसमेंट ऑनलाइन पद्धतीने पार पडल्या. आयआयटी मुंबईत गेल्यावर्षीच्या तुलनेत १९१ संधी कमी आल्याचे समोर आले आहे. तर भारतीय कंपन्यांनी यंदा सर्वाधिक वार्षिक ६४ लाखांचे पॅकेज दिले आहे. आयआयटीमध्ये यावर्षीचा पहिला प्लेसमेंट हंगाम सुरू झाला आहे. आयआयटी मुंबईत पहिल्या टप्प्यात ३१० कंपन्या सहभागी झाल्या होत्या. यात मायक्रोसॉफ्ट, गुगल, टेक्सास इन्स्ट्रुमेंट्स, क्वालकॉम, बोस्टन कन्सलटिंग ग्रुप, अॅपल आदी कंपन्यांचा समावेश होता. पहिल्या टप्प्यात सहभागी कंपन्यांकडून ११२८ ऑफर देण्यात आल्या. यापैकी ९७३ विद्यार्थ्यांनी या ऑफर स्वीकारल्या. यंदाची नोकरी संधींची संख्या ही गेल्या चार वर्षांतील पहिल्या टप्प्यातील संधींच्या तुललेत कमी असल्याचे आकडेवारीवरून समोर आले आहे. यंदाच्या ऑफरमध्ये प्री-प्लेसमेंट ऑफर १८२ इतक्या होत्या तर कॅम्प्स प्लेसमेंट ऑफरची संख्या ९४६ आहेत. या वर्षात सर्वाधिक ऑफर या इंजिनीअरिंग आणि टेक्नॉलॉजी या क्षेत्रातील कंपन्यांच्या आल्या आहेत. आयआयटी मुंबईतील विद्यार्थ्यांचे तांत्रिक कौशल्य पाहून त्यांना या क्षेत्रातील सर्वाधिक ऑफर मिळाल्याचे संस्थेने प्रसिद्ध केलेल्या पत्रकात स्पष्ट करण्यात आले आहे. पहिल्या टप्प्यातील प्लेसमेंटमध्ये सार्वजनिक क्षेत्रातील दोन कंपन्या सहभागी झाल्या होत्या. या कंपन्यांनी विद्यार्थ्यांना ५ ऑफर देऊ केल्या आहेत. दुसऱ्या टप्प्यातील कॅम्पस प्लेसमेंटमध्ये सार्वजनिक क्षेत्रातील आणखी कंपन्या सहभागी होतील, असा विश्वास संस्थेने व्यक्त केला आहे. या महामारीच्या काळात प्लेसमेंट टीमने जास्तीत जास्त ऑफर मिळाव्यात यासाठी विशेष मेहनत घेतल्याचे संस्थेने स्पष्ट केले आहे. पहिल्या टप्प्यातील प्लेसमेंटनंतर आता सर्वांचे लक्ष दुसऱ्या टप्प्याकडे लागले आहे. आंतरराष्ट्रीय पर्याय यंदा विद्यार्थ्यांना एकूण ५८ आंतरराष्ट्रीय संधी मिळाल्या आहेत. यामध्ये अमेरिका, जपान, यूएई, सिंगापूर, नेदरलॅण्ड्स, हाँगकाँग आणि तैवान या देशांचा समावेश आहे. तर आंतरराष्ट्रीय कंपन्यांनी देऊ केलेल्या संधींपैकी एका कंपनीने १.५७ लाख युरोचे सर्वाधिक पॅकेज दिले आहे. गेल्या पाच वर्षांतील पहिल्या टप्प्यातील संधी वर्ष -- आलेल्या संधी -- स्वीकारलेल्या संधी २०१७-१८ -- ११५६ -- १०२३ २०१८-१९ -- १२७० -- ११२२ २०१९-२० -- १३१९ -- ११७२ २०२०-२१ -- ११२८ -- ९७३ क्षेत्रनिहाय सरासरी वार्षिक पॅकेज क्षेत्र पॅकेज (लाखांत) इंजिनीअरिंग अॅण्ड टेक्नॉलॉजी १६.९५ आयटी, सॉफ्टवेअर २२.३५ फायनान्स १५.०३ रिसर्च अॅण्ड डेव्हलपमेंट २२.७२ कन्सल्टिंग १३.३०

from Career News in Marathi: Career News, मराठी Career बातम्या | Maharashtra Times https://ift.tt/3p4iRKe
via IFTTT