पुणे विद्यापीठाची अधिसभा ९, १० जानेवारीला

म. टा. प्रतिनिधी, पुणे सावित्रीबाई फुले पुणे विद्यापीठाची बहुप्रतीक्षित अधिसभा येत्या ९ व १० जानेवारी रोजी होणार आहे. जूनमध्ये झालेल्या अर्थसंकल्पीय ऑनलाइन अधिसभेनंतर आता दोन दिवस प्रत्यक्ष अधिसभा होणार असल्याने ही अधिसभा वादळी ठरण्याची चिन्हे आहेत. पहिल्यांदाच झालेल्या ऑनलाइन परीक्षा, त्यातील तांत्रिक त्रुटी हे मुद्दे या अधिसभेत गाजतील, अशी शक्यता वर्तविली जात आहे. येत्या ९ व १० जानेवारी रोजी विद्यापीठाची अधिसभा घेण्यासाठी विद्यापीठाचे कुलपती व राज्यपाल भगतसिंह कोश्यारी यांची मान्यता घेण्यात आली आहे. त्यासाठी विद्यापीठ स्तरावर नियोजनही सुरू झाले आहे. वर्षातून दोन वेळा विद्यापीठाची अधिसभा घेतली जाते. गेल्या वर्षी डिसेंबरमध्ये अधिसभा पार पडली. त्यानंतर करोना व लॉकडाउनमुळे मार्चमध्ये आयोजित अर्थसंकल्पीय अधिसभा रद्द करावी लागली. त्यानंतर जूनमध्ये ऑनलाइन पद्धतीने ही अधिसभा पार पडली. जूनमध्ये ऑनलाइन पद्धतीने अधिसभा घेण्यास काही अधिसभा सदस्यांनी विरोध दर्शविला होता. मात्र, ही अधिसभा ऑनलाइन पद्धतीनेच झाली. त्यानंतर पहिल्यांदाच प्रत्यक्ष अधिसभा होणार आहे. दरम्यानच्या काळात यूजीसी व सुप्रीम कोर्टाच्या आदेशाने ऑनलाइन व ऑफलाइन दोन्ही माध्यमातून पहिल्यांदाच बहुपर्यायी पद्धतीने झालेल्या अंतिम वर्षांच्या परीक्षेतील गोंधळ चांगलाच गाजला होता. या पार्श्वभूमीवर येत्या अधिसभेत या परीक्षेतील तांत्रिक समस्या, निकालातील त्रुटी हे मुद्दे ऐरणीवर येतील, अशी शक्यता आहे.

from Career News in Marathi: Career News, मराठी Career बातम्या | Maharashtra Times https://ift.tt/3pm2qJi
via IFTTT