करोनाकाळात उपासमार; संतप्त 'स्कूलबस काकां'चे आज आंदोलन

म. टा. प्रतिनिधी, मुंबई विद्यार्थी वाहतूक क्षेत्रात पूर्णवेळ कार्यरत असलेले स्कूलबसमधील 'काका' आणि 'मावशी' आज करोनाकाळात अत्यंत हलाखीचे जीवन जगत आहेत. सरकारकडून दिलासा नाही, शाळा बंद असल्याने फी नाही आणि प्रवासी वाहतूक करण्यास मनाई अशा कात्रीत यांचे भविष्यच उद्धवस्त होण्याची भीती निर्माण झाली आहे. आपला रोष राज्य सरकारच्या कानी पोहचवण्यासाठी हे स्कूलकाका-मावशी आज, मंगळवारी सकाळी १० वाजल्यापासून आझाद मैदानात आंदोलन करणार आहेत. अखिल महाराष्ट्र राज्य विद्यार्थी वाहतूक महासंघाने या आंदोलनाची हाक दिली आहे. बंद असलेल्या बसगाड्यांचे आयुर्मान वर्षभरासाठी वाढवून मिळावे, एक वर्षाची करमाफी मिळावी, पासिंग-फिटनेस-मेंटेनन्स-पीयूसी-विमा यांसाठी मोठ्या स्कूलबसला दीड लाख रुपये, मध्यम आकाराच्या बसला एक लाख आणि लहान (सात आसनी) गाड्यांना ५० हजार रुपयांचे अनुदान मिळावे, तसेच कर्ज व हप्ते यांवरील व्याज कमी करण्यासाठी राज्य सरकारने पुढाकार घ्यावा, स्थानिक महापालिका परिक्षेत्रामध्ये टप्पा किंवा लोकल प्रवासी वाहतूक करण्याची मुभा द्यावी, अशा मागण्या स्कूलबस चालकांच्या संघटनेच्या आहेत. करोनाकाळात शाळा बंद असल्याने स्कूलबसवर अवलंबून असलेल्यांचे कुटुंबीय गेले नऊ महिने 'मिळेल ते काम' करून जगण्यासाठी संघर्ष करत आहेत. अशातच बँक, पतपेढ्या, फायनान्स कंपन्या या घराच्या व गाडीच्या कर्जांच्या परतफेडीसाठी तगादा लावत आहेत. अनेक वित्तीय संस्था नोटिसा पाठवून नोटिस शुल्कही कर्जाच्या रकमेत जोडण्याचा प्रकार करत असल्याचे स्कूलबस चालकांचे म्हणणे आहे. लाक्षणिक उपोषण अखिल महाराष्ट्र राज्य विद्यार्थी वाहतूक महासंघाच्या वतीने हे एक दिवसाचे लाक्षणिक उपोषण करण्यात येणार आहे. या आंदोलनात राज्यभरातील सर्व विद्यार्थी वाहतूक चालक, मालक, मदतनीस उपस्थित राहणार आहेत, असे महासंघातर्फे सांगण्यात आले.

from Career News in Marathi: Career News, मराठी Career बातम्या | Maharashtra Times https://ift.tt/2IPV953
via IFTTT