'रामानुजन गणितज्ञ पुरस्कार' यंदा प्रथमच विदेशी व्यक्तीला

for : युवा गणितज्ञांना दिला जाणारा रामानुजन पुरस्कार यंदा ब्राझीलच्या रिओ द जेनेरिओ येथील गणितज्ञ डॉ. कॅरोलिना अरुजो यांना प्रदान करण्यात आला. ९ डिसेंबर २०२० रोजी एका व्हर्च्युअल सोहळ्यात हा पुरस्कार देण्यात आला. अरुजो या इन्स्टिट्यूट फॉर प्युअर अँड अप्लाइड मॅथेमॅटिक्सच्या गणितज्ञ आहेत. हा पुरस्कार पटकावणाऱ्या त्या पहिल्या अशा व्यक्ती आहेत, ज्या भारतीय नाही. आतापर्यंत हा पुरस्कार भारतीयांनाच मिळाला आहे. इंटरनॅशनल मॅथेमॅटिकल युनियनच्या महिला समितीच्या अराजुओ या उपाध्यक्ष आहेत. त्यांनी बायरॅशनल जॉमेट्रीवर या विषयावर काम केले आहे. भारत सरकारचा विज्ञान तंत्रज्ञान विभाग आणि इंटरनॅशनल सेंटर फॉर थिओरॉटिकल फिजिक्स (ICTP) यांच्या संयुक्त विद्यमाने दरवर्षी हा पुरस्कार दिला जातो. विज्ञान आणि तंत्रज्ञान विभागाचे सचिव प्रा. आषुतोश शर्मा यांनी अरुजो यांना आपल्या विज्ञान ज्योती या महिला वैज्ञानिकांसाठी असलेल्या कार्यक्रमाची माहिती दिली आणि त्यांना भारतात येऊन भारतीय महिलांना आपल्या उदाहरणाद्वारे प्रेरणा देण्यासाठी आमंत्रणही दिले. इंटरनॅशनल मॅथेमॅटिकल युनियनचे अध्यक्ष प्रा. कार्लोस केनिग यांनीही अरुजो यांचे अभिनंदन केले. युनेस्कोचे भारतीय दूत विशार शर्मा म्हणाले, 'गणितज्ञ हा कोणत्याही देशाचा नसतो, तर तो गणितज्ञ असतो. कारण गणित ही ब्रह्मांडाची भाषा आहे.' पुरस्कार कार्यक्रमात अरुजो यांनी अल्जेब्रिक जॉमेट्रीबद्दल तसेच बायरॅशनल जॉमेट्रीबद्दल भाष्य केले. डॉ. रामानुजन पुरस्कार दरवर्षी विकसनशील देशात गणिती संशोधन करणाऱ्या ४५ वर्षांहून कमी वयाच्या तरुण गणितज्ञाला दिला जातो. विख्यात गणितज्ञ श्रीनिवास रामानुजन यांच्या स्मृतिप्रित्यर्थ हा पुरस्कार दिला जातो.

from Career News in Marathi: Career News, मराठी Career बातम्या | Maharashtra Times https://ift.tt/2KmuKvR
via IFTTT