Engineering Admission 2021: सुधारित वेळापत्रक जाहीर

म. टा. विशेष प्रतिनिधी, मुंबई राज्याच्या सामायिक प्रवेश कक्षाने (CET Cell) तंत्रशिक्षण अभ्यासक्रमांच्या प्रवेशाचे सुधारित वेळापत्रक सोमवारी प्रसिद्ध केले. सुधारित वेळापत्रकानुसार २१ जानेवारीपासून कॉलेज सुरू होणार आहेत. इंजिनीअरिंग, फार्मसी, आर्किटेक्चर, हॉटेल मॅनेजमेंट, एमसीए आणि एमटेक आदी अभ्यासक्रमांसाठी हे वेळापत्रक लागू असेल. पहिल्या फेरीत जाहीर झालेल्या जागेवरील प्रवेश आता २० जानेवारी रोजी दुपारी तीनपर्यंत विद्यार्थी त्यांच्या लॉग इनमधून मान्य करू शकतील किंवा स्वीकारू शकतील. त्यानंतर आवश्यक कागदपत्रे व शुल्क भरून विद्यार्थ्यांना २० जानेवारी रोजी सायंकाळी पाच वाजेपर्यंत आपला प्रवेश निश्चित करता येईल. २१ जानेवारी रोजी दुसऱ्या फेरीसाठी उपलब्ध जागांचा तपशील प्रसिद्ध होईल. २१ ते २३ जानेवारीदरम्यान विद्यार्थ्यांना दुसऱ्या फेरीसाठी पसंतीक्रम नोंदवता येतील. २५ जानेवारी रोजी दुसऱ्या फेरीचे प्रवेश जाहीर होतील. २६ ते ३० जानेवारी (दुपारी तीनपर्यंत) विद्यार्थ्यांना आपल्या लॉग इनमधून प्रवेश मान्य करता येईल. २७ ते ३० जानेवारी (सायंकाळी पाचपर्यंत) विद्यार्थ्यांना संबंधित संस्थेत शुल्क भरून व कागदपत्रे सादर करून प्रवेश निश्चित करता येईल. २१ जानेवारीपासून सर्व कॉलेज सुरू होतील. या प्रवेशप्रक्रियेसाठी पाच फेब्रुवारी ही अंतिम तारीख असेल. मराठा आरक्षणाला स्थगिती मिळाल्याने या विद्यार्थ्यांना खुला गट किंवा आर्थिकदृष्ट्या दुर्बल घटक (इडब्ल्यूएस) या प्रवर्गातून प्रवेश घेण्यास सांगण्यात आले. यासाठी विद्यार्थ्यांना कागदपत्रांची जुळवाजुळव करण्यासाठी अडचणी येत होत्या. त्यामुळे प्रवेशप्रक्रियेला मुदतवाढ देण्याची मागणी होत होती. त्यानुसार २० जानेवारीपर्यंत विविध कागदपत्रे सादर करण्यास मुदतवाढ देण्यात आली. त्यानंतर हे सुधारित वेळापत्रक प्रसिद्ध करण्यात आले आहे.

from Career News in Marathi: Career News, मराठी Career बातम्या | Maharashtra Times https://ift.tt/39NV8rA
via IFTTT