JEE Main, NEET मधील प्रश्न सुधारित अभ्यासक्रमानुसार

आगामी जेईई, नीट परीक्षांमध्ये सुधारित अभ्यासक्रमावर आधारित प्रश्न विचारले जातील अशी घोषणा केंद्रीय शिक्षणमंत्री रमेश पोखरियाल यांनी केली. केंद्रीय विद्यालयांच्या विद्यार्थी आणि शिक्षकांसोबत पोखरियाल यांनी सोमवारी संवाद साधला. त्यावेळी ते बोलत होते. इंजिनीअरिंग पदवी अभ्यासक्रमांना घेतली जाणारी प्रवेश परीक्षा जेईई मेन २०२१ आणि वैद्यकीय पदवी अभ्यासक्रमांच्या प्रवेशांसाठी होणारी NEET 2021 या दोन्ही परीक्षा कमी अभ्यासक्रमावर आधारित असतील, असेही त्यांनी सांगितले. करोना महामारीच्या पार्श्वभूमीवर विद्यार्थ्यांच्या शैक्षणिक वर्षावर परिणाम झाल्याने केंद्रीय माध्यमिक शिक्षण मंडळ (CBSE) सह अनेक राज्यांच्या बोर्डांनी दहावी, बारावीच्या अभ्यासक्रमात कपात केली आहे. पोखरियाल यांनी वेबिनारच्या दरम्यान सांगितले की जेईई, नीटच्या विद्यार्थ्यांना केवळ सीबीएसई बोर्ड परीक्षा आणि अन्य बोर्डांच्या दहावी बारावीच्या कपात केल्यानंतरच्या सुधारित अभ्यासक्रमाचीच तयारी करावी लागेल. शाळा लवकरच ऑफलाइन सुरू होतील, असे सांगताना त्यांनी ऑफलाइनसह ऑनलाइन शिक्षणही सुरूच राहील असे सांगितले. यापूर्वीही पोखरियाल यांनी सीबीएसई तसेच जेईई मेन परीक्षांच्या तारखांची घोषणा करण्यासाठी लाइव्ह वेबिनार घेतले होते. सीबीएसई बोर्डाच्या दहावी, बारावीच्या परीक्षा ४ मे ते १० जून या कालावधी दरम्यान होणार आहेत. निकाल १५ जुलैपर्यंत घोषित केले जाणार आहेत.

from Career News in Marathi: Career News, मराठी Career बातम्या | Maharashtra Times https://ift.tt/2M1S4jD
via IFTTT