ठाणे जिल्ह्यातील ऑनलाइन शिक्षण: सव्वा लाखांहून अधिक 'पाट्या फुटल्या'

जान्हवी पाटील, ठाणे करोनाच्या संसर्गामुळे ठाणे जिल्ह्यातील शाळांना गेल्या वर्षभरापासून कुलूप आहे. शाळा बंद असल्या तरी विद्यार्थ्यांचे शैक्षणिक नुकसान होऊ नये यासाठी राज्य सरकाने ऑनलाइन वर्गांचा पर्याय निवडला. पण गेल्या वर्षभरापासून या ऑनलाइन वर्गात ५० ते ६० टक्केच विद्यार्थी सहभागी होऊ शकले. इतर ४० ते ५० टक्के विद्यार्थी शिक्षणाच्या प्रवाहाबाहेर फेकले गेले. ऑनलाइन वर्ग सुरू झाल्यानंतर घेण्यात आलेल्या सर्वेक्षणामध्ये आणि आता शाळाबाह्य विद्यार्थ्यांच्या सर्वेक्षणातील गळतीच्या संख्येत मोठी तफावत दिसून येत असल्याचे अधोरेखित होत आहे. ठाणे जिल्ह्यातील पाच तालुक्यांत पहिली ते बारावीमधील एकूण १ लाख ३१ हजार ०९७ विद्यार्थी शाळेत जाऊ शकले नसल्याची माहिती हाती आली आहे. ठाणे जिल्ह्यात पहिली ते बारावीपर्यंत एकूण १६ लाख ५८ हजार ६०९ विद्यार्थी आहेत. करोनाचा संसर्ग रोखण्यासाठी लॉकडाउन करण्यात आले. शाळा बंद झाल्या. सुरू राहिले तरी अनेक विद्यार्थी शिक्षणाच्या मुख्य प्रवाहाबाहेर गेले. या विद्यार्थ्यांना पुन्हा मुख्य प्रवाहात आणण्यासाठी राज्य सरकारने १ ते १० मार्च या कालावधीत विशेष मोहिती हाती घेतली होती. १० मार्चला हे सर्वेक्षण संपले आहे. ही माहिती संकलीत करण्यासाठी शिक्षण विभागाला ८ ते १० दिवस लागणार आहेत. करोना काळात शिक्षणावर विपरित परिणाम झाला. ग्रामीण तसेच शहरातील ज्या विद्यार्थ्यांकडे ऑनलाइन शिक्षणासाठी साधने उपलब्ध नव्हती, तसेच ज्या कुटुंबांना स्थलांतरित व्हावे लागले त्यातील बहुतांश विद्यार्थी शिक्षणाच्या प्रवाहाबाहेर गेल्याचे आकडेवारीवरून स्पष्ट होत आहे. महापालिकेची माहिती अद्यापही उपलब्ध नाही. महापालिकेच्या शाळाबाह्य विद्यार्थ्यांची संख्या १११५ असून करोनामुळे शाळेत जाऊ न शकलेल्या विद्यार्थ्यांची माहिती अद्याप उपलब्ध नसल्याचे सांगण्यात आले प्रत्यक्ष आकडा मोठा करोनामुळे गावी गेलेले, स्मार्ट फोन नसलेले, दोन पाल्य असल्याने, आर्थिक अशा अनेक कारणांमुळे अनेक विद्यार्थी शिक्षणाच्या प्रवाहाबाहेर फेकले गेले. हा कागदोपत्री आकडा १ लाख ३१ हजार असला तरी खासगी, विना अनुदानित शाळांमधील विद्यार्थ्यांची संख्या मिळून हा आकडा आणखी मोठा होईल. कारण शहरातील एका शाळेत तीन हजारांची पटसंख्या असली तरी केवळ दीड हजार विद्यार्थी ऑनलाइन वर्गात सहभागी होत असल्याचे एका शिक्षण तज्ज्ञांनी सांगितले.

from Career News in Marathi: Career News, मराठी Career बातम्या | Maharashtra Times https://ift.tt/3r3jqo2
via IFTTT