सीए, सीएसला पदव्युत्तर पदवीचा दर्जा

म. टा. विशेष प्रतिनिधी, मुंबई सीए, सीएस, आयसीडब्लूए यांसारख्या कठीण व्यावसायिक अभ्यासक्रमांना आता पदव्युत्तर पदवीचा दर्जा देण्यात आला आहे. याचा फायदा हे शिक्षण घेऊन शैक्षणिक क्षेत्रात करिअर करू इच्छिणाऱ्या हजारो विद्यार्थ्यांना दिलासा मिळणार आहे. देशातील सर्वोच्च काठिण्य पातळी असलेले हे व्यावसायिक अभ्यासक्रम पूर्ण करणाऱ्या विद्यार्थ्यांना शैक्षणिक क्षेत्रात करिअर करायचे असेल तर नाही म्हणून बंधने येत होती. याचबरोबर जागतिक स्तरावरील शिक्षणातही अडचणी येत होत्या. यामुळे हे व्यावसायिक अभ्यासक्रम करणाऱ्या विद्यार्थ्यांना पदव्युत्तर पदवी समकक्ष द्यावी, अशी मागणी गेल्या अनेक वर्षांपासून होत होती. याबाबत अभ्यास करण्यासाठी एक समिती स्थापन करण्यात आली होती. या समितीच्या शिफारशीनुसार अनुदान आयोगाने ही मागणी मान्य केली आहे. यानुसार यापुढे , सीएस आणि आयसीडब्लूए अभ्यासक्रम पूर्ण करणाऱ्या विद्यार्थ्यांना पदव्युत्तर पदवी शिक्षण पूर्ण झाल्याचा दर्जा मिळणार आहे. म्हणजे या विद्यार्थ्यांना जर पुढे पीएच.डी.चे शिक्षण करायचे असेल तर त्यांना याच व्यावसायिक पदवीच्या आधारे 'पेट' परीक्षा देऊन पुढील शिक्षण पूर्ण करता येणार आहे. याचबरोबर जागतिक स्तरावर करिअर करू शकणाऱ्या विद्यार्थ्यांनाही यामुळे दिलासा मिळणार आहे. याबाबत आयोगाचे सहसचिव यांनी परिपत्रक काढले आहे. अध्यापन करण्याचा मार्ग मोकळा सीए, सीएस, आयसीडब्लूएसारखे व्यावसायिक शिक्षण पूर्ण असूनही अनेक विद्यार्थ्यांना महाविद्यालयामध्ये अध्यापन करण्याची इच्छा असल्यास ती पूर्ण करता येत नव्हती. अनेकांना या पदवीनंतरही अध्यापनाचे काम करण्यासाठी पदव्युत्तर पदवी शिक्षण पूर्ण करावे लागत होते. मात्र, आता या निर्णयामुळे या विद्यार्थ्यांना दिलासा मिळणार असल्याचे मत इन्स्टिट्यूट ऑफ चार्टर्ड अकौंटंट ऑफ इंडियाच्या केंद्रीय समितीचे सदस्य चंद्रशेखर चितळे यांनी मांडले. याचबरोबर या निर्णयाचा फायदा पुढील शिक्षण घेऊ इच्छिणाऱ्या विद्यार्थ्यांनाही होऊ शकणार आहे, असेही ते म्हणाले.

from Career News in Marathi: Career News, मराठी Career बातम्या | Maharashtra Times https://ift.tt/3vwEAP9
via IFTTT