पुणे विद्यापीठ देतेय अर्धवट शिक्षण पूर्ण करण्याची संधी

म. टा. प्रतिनिधी, पुणे उच्च शिक्षण पूर्ण करू न शकणाऱ्या विद्यार्थ्यांना पदवी, पदव्युत्तर अभ्यासक्रम पूर्ण करण्याची संधी सावित्रीबाई फुले पुणे विद्यापीठाने दिली आहे. विद्यापीठ आयोगाच्या अधिसूचनेनुसार (यूजीसी) पुणे विद्यापीठाने नियमावलीत काही महत्त्वाचा बदल केले आहेत. त्यानुसार शैक्षणिक वर्ष २०१६-१७ पूर्वीचे विद्यार्थी आताच्या अभ्यासक्रमाचे विषय घेऊन त्याची परीक्षा देऊ शकतात. या परीक्षेत उत्तीर्ण झाल्यावर त्यांना अभ्यासक्रमाची पदवी मिळू शकतात. उच्च शिक्षणात पदवी किंवा पदव्युत्तर पदवी घेणाऱया काही विद्यार्थ्यांना आर्थिक-कौटुंबिक, शारीरिक अडचणींमुळे शिक्षण अर्धवट सोडावे लागते. काही वर्षांनी पुन्हा राहिलेले शिक्षण पूर्ण करायची इच्छा झाल्यास तोपर्यंत अभ्यासक्रम बदललेला असतो. त्यामुळे पूर्वीच्या अभ्यासक्रमाच्या विद्यार्थ्यांना नव्या अभ्यासक्रमानुसार परीक्षा देण्याची मुभा नसल्याने अनेकांना पदवीपासून वंचित राहावे लागते. अशा परिस्थितीत पदवी, पदव्युत्तर अभ्यासक्रम पूर्ण करू न शकलेल्या विद्यार्थ्यांना आता त्यांचे राहिलेले शिक्षण पूर्ण करता येणार आहे. याबाबत 'यूजीसी'ने अधिसूचना प्रसिद्ध करून विद्यापीठांना अंमलबजावणी करण्याच्या सूचना दिल्या होत्या. त्याची अंमलबजावणी विद्यापीठाच्या परीक्षा व मूल्यमापन मंडळाकडून करण्यात येत आहे. विद्यापीठाच्या विद्या परिषदेने जुन्या विद्यार्थ्यांना नव्या अभ्यासक्रमानुसार परीक्षा देऊन पदवी मिळवण्याची सुविधा प्राप्त करून देण्याचा निर्णय घेतला आहे. त्यासाठी नियमांत बदलही करण्यात आला आहे. ' शैक्षणिक वर्ष २०१६-१७ पूर्वीच्या जुन्या पॅटर्नच्या विद्यार्थ्यांना समकक्षता देण्याचा निर्णय विद्यापीठाच्या विद्या परिषदेने घेतला. संबंधित जुने विद्यार्थ्यांना सध्याच्या अभ्यासक्रमानुसार विषय घेऊन परीक्षा देण्याची मुभा देण्यात आली आहे. त्यामुळे या विद्यार्थ्यांना त्यांचे राहिलेले शिक्षण पूर्ण करण्याची संधी मिळेल,' असे परीक्षा व मूल्यमापन मंडळाचे संचालक डॉ. महेश काकडे यांनी सांगितले. मल्टिपल एंट्री मल्टिपल एक्झिटची सुविधा 'आपल्या देशात सुमारे पाच टक्क्यांच्या आसपास विद्यार्थी शिक्षणातून बाहेर (ड्रॉप आउट) जातात. त्यांना शिक्षण पूर्ण करायची इच्छा असल्यास आता संधी मिळू शकेल. पदवी पूर्ण केल्याचे मानसिक समाधान, सामाजिक आणि आर्थिक स्थैर्य मिळेल. नव्या शैक्षणिक धोरणातही 'मल्टिपल एंट्री मल्टिपल एक्झिट'ची सुविधा देण्यात आली आहेत. त्या धर्तीवरच जुन्या विद्यार्थ्यांना पुन्हा प्रवाहात येता येईल. पुणे विद्यापीठाच्या आगामी सत्र परीक्षांपासून या निर्णयाची अंमलबजावणी करण्यात येईल,' असेही डॉ. महेश काकडे यांनी सांगितले.

from Career News in Marathi: Career News, मराठी Career बातम्या | Maharashtra Times https://ift.tt/3gmVPNq
via IFTTT