यंदाही चार भिंतींतूनच उन्हाळी शिबीर

म. टा. विशेष प्रतिनिधी मुंबई : करोनाचा कहर कमी जाणवायला लागल्यावर शाळा आणि क्लास सुरू झाल्याने मे महिन्यामध्ये प्रत्यक्ष घराबाहेर जाऊन कार्यशाळा, शिबिरे अनुभवता येतील, अशी आशा निर्माण झाली होती. मात्र पुन्हा एकदा करोनाने डोके वर काढल्याने यंदाही ऑनलाइन कार्यशाळा आणि शिबिरांवरच भर देण्यात येईल, अशी चिन्हे आहेत. मोकळ्या वातावरणातील, प्रत्यक्ष समवयस्क मुलांमध्ये मिसळून शिकण्याच्या संधीसाठी यंदाही वाट पाहावी लागेल. मुंबई मराठी साहित्य संघ आणि ड्रामा स्कूल, मुंबईच्या माध्यमातून नाट्य प्रशिक्षण कार्यशाळेचे आयोजन करण्यात आले आहे. ही कार्यशाळा ऑनलाइन होईल. यात चार कार्यशाळा होणार असून, पात्र परिचय, देहबोली आणि कथावस्तू, अभिनय अभ्यास, प्रयोगशाळा आणि स्वराभिनय शिकवण्यात येईल. प्रमुख कार्यवाह डॉ. अश्विनी भालेराव-गांधी म्हणाल्या, 'ड्रामा स्कूलचे विविध उपक्रम करोनाच्या आधीही सुरू होते. मात्र गेल्या वर्षभरात ऑनलाइन उपक्रमांना सुरुवात केली असून पहिल्यांदाच मराठीतून नाट्य प्रशिक्षण कार्यशाळा होणार आहे.' 'करोनाच्या काळातील बदलांमुळे नाट्य प्रशिक्षणाचा प्रयोग करण्यात येणार असून याला मिळणारा प्रतिसाद, मुलांचे शिक्षण या सगळ्या पार्श्वभूमीवर हा प्रयोग पुढे कसा न्यायचा याचा विचार करण्यात येईल', असे त्या म्हणाले. यानंतरच्या काळात कदाचित काही वेळा ऑनलाइन, काही वेळा प्रत्यक्ष अशा पद्धतीनेही हे पुढे नेण्यात येईल, अशीही माहिती त्यांनी दिली. मालाडच्या 'प्रयोग मालाड' या संस्थेच्या माध्यमातून जानेवारीपासून 'इतिहासातील सोनेरी पाने' हा उपक्रम राबवण्यात येत आहे. १० एप्रिलपासून या उपक्रमाचे दुसरे सत्र सुरू होईल. या माध्यमातून सन १९७५ ते १९९५ या एकांकिकांच्या सुवर्ण काळातील एकांकिका लोकांसमोर सशुल्क सादर होतील. डिसेंबरपर्यंत ४८ एकांकिका दाखवून त्यातून दस्तावेजीकरण आणि हौशी कलाकारांना काही शिकण्याची संधी, नाट्यरसिकांना आनंद देण्याचा प्रयत्न असे लक्ष्य साधण्याचा प्रयोग केला जात आहे. सन २०१४पासून 'प्रयोग मालाड'ने गाजलेल्या लेखकांच्या साहित्यावर आधारित 'लेखक एक, नाट्यछटा अनेक' स्पर्धा आयोजित केली होती. मात्र करोनाने गेल्या वर्षी यामध्ये अडचणी निर्माण झाल्याने ही चळवळ पुढे नेण्याचा ऑनलाइन माध्यमातून होत असल्याचे कार्याध्यक्ष प्रदीप देवरुखकर यांनी सांगितले. नाट्यशिबिरांसाठी सुरक्षित वावर? अखिल भारतीय मराठी नाट्य परिषदेच्या बोरिवली शाखेचे अध्यक्ष प्रदीप कबरे यांनी, नाटकाचे ऑनलाइन पद्धतीने शिक्षण देणे कठीण आहे, असे मत व्यक्त केले. 'सध्या कथकचे वर्ग ऑनलाइन पद्धतीने चालत आहेत. मात्र पुढील परिस्थितीचा विचार करून यंदा १८ वर्षांवरील विद्यार्थ्यांसाठी सुरक्षित वावराचा विचार करून नाट्य शिबीर घेता येईल का, याचा निर्णय घेतला जाईल', असे ते म्हणाले. तबला, पेटी, नाटक अशा कला ऑनलाइन माध्यमातून शिकणाऱ्यांपर्यंत पूर्णत्वाने पोहोचत नसल्याची खंत त्यांनी व्यक्त केली. विज्ञान लेखनही ऑनलाइनच विविध लेखन शिबिरांचेही येत्या काळात आयोजन करण्यात येणार आहे. 'आय ट्रान्सफॉर्म' व्यासपीठाच्या माध्यमातून ऑनलाइन विज्ञान लेखन कार्यशाळेचे आयोजन करण्यात येणार आहे. ज्येष्ठ विज्ञान लेखक डॉ. बाळ फोंडके, निरंजन घाटे, सुबोध जावडेकर आणि डॉ. मेघश्री दळवी यात मार्गदर्शन करणार आहेत.

from Career News in Marathi: Career News, मराठी Career बातम्या | Maharashtra Times https://ift.tt/3cSEOsx
via IFTTT