गरीब मुलांच्या शिक्षणाला जुन्या मोबाइलचा आधार

म. टा. विशेष प्रतिनिधी मुंबई : मुंबईसह संपूर्ण राज्यात करोनामुळे शाळा, कॉलेजे बंद असल्याने सध्या शालेय शिक्षण ऑनलाइन पद्धतीने सुरू आहे. परंतु अनेक गरीब कुटुंबांमध्ये अँड्राइड मोबाइल नसणे, कमतरता असणे आदी अनेक समस्या येतात. अशा कुटुंबांतील विद्यार्थ्यांची शिक्षणाची आबाळ होऊ नये म्हणून त्यांच्या सुविधेसाठी जुने अँड्रॉइड मोबाइल, चार्जर देण्याचे आवाहन शाळा, वसतिगृह चालवणाऱ्या 'टच' या स्वयंसेवी संस्थेने केले आहे. अँड्रॉइड मोबाइलची वानवा असलेल्या गरीब घरातील विद्यार्थ्यांसाठी संस्थेने हा उपक्रम हाती घेतला आहे. त्याआधारे मुंबईतील सुमारे तीन हजार विद्यार्थ्यांना हे मोबाइल, चार्जर देण्यासाठी प्रयत्न चालवले आहेत. समाजातील मोठ्या घटकांसमोर आर्थिक, सामाजिक, सांस्कृतिक बदलांचे आव्हान निर्माण झाले आहे. त्याचा स्वाभाविक परिणाम शिक्षणावरही झाला आहे. करोनामुळे गोरगरीब घटकांतील कुटुंबातील विद्यार्थ्यांसमोर शिक्षण घेण्यावरही मर्यादा आल्या आहेत. ऑनलाइन शिक्षणासाठी अँड्राइड मोबाइल फोन नसणे हे एक प्रमुख कारण ठरले आहे. त्या कुटुंबात अँड्राइड फोन असल्यास त्यांची संख्याही मर्यादित असते. त्यामुळे एकापेक्षा जास्त भावंड असल्यास एकाचवेळी सगळ्यांना मोबाइलवरून ऑनलाइन शिक्षण घेणे अशक्य ठरते. त्याचप्रमाणे रस्त्यावर, उड्डाणपुलांखाली राहणाऱ्या कुटुंबांसमोरही दैनंदिन जगण्याची भ्रांत असते. त्यांच्याकडे अँड्राइड मोबाइल वा कम्प्युटर, लॅपटॉप अशा सुविधा असण्याची शक्यताच नाही. अशा कुटुंबातील काही मुलांच्या शिक्षणाचीही जबाबदारी 'टच' संस्थेने स्वीकारली आहे. त्या मुलांप्रमाणे मुंबईतील गरीब विद्यार्थ्यांना शिक्षणाची संधी मिळावी म्हणून जुने आणि चांगले चालणारे मोबाइल, चार्जर देण्याचे आवाहन संस्थेने केले आहे. देणाऱ्याने देत जावे... जुन्या अँड्राइड मोबाइलच्या सहाय्याने तीन हजार विद्यार्थ्यांना शिक्षण घेणे सोपे ठरणार आहे. 'टच'तर्फे या विद्यार्थ्यांचा जीवनस्तर उंचावण्याचा प्रयत्न केला जात आहे. त्यासाठी जुन्या मोबाइलप्रमाणेच अन्य काही स्वरूपात मदत करणे शक्य असल्यास सहाय्य करण्याचे आवाहन संस्थेने केले आहे. संपर्क : ९८१९४५३८७३ / ०२२-२८९८२२४४, योगेश सरोदे : ८७६६८२५४८५.

from Career News in Marathi: Career News, मराठी Career बातम्या | Maharashtra Times https://ift.tt/3seXQxG
via IFTTT