मराठवाडा विद्यापीठाच्या सुरू असलेल्या पदवी परीक्षा पुढे ढकलल्या

म. टा. प्रतिनिधी, औरंगाबाद करोनाचा वाढत्या प्रादुर्भावामुळे कडक निर्बंध लावताच डॉ. बाबासाहेब आंबेडकर मराठवाडा विद्यापीठाने सुरू असलेल्या पदवी परीक्षा पुढे ढकलण्याचा निर्णय घेतला. तीन मेपासून परीक्षा सुरू होतील असे विद्यापीठ प्रशासनाकडून कळविण्यात आले. विद्यापीठातील परंपरागत पदवी अभ्यासक्रमाच्या द्वितीय व तृतीय वर्षांच्या अभ्यासक्रमाच्या परीक्षा १६ मार्चपासून, ६ एप्रिलपासून अभियांत्रिकीसह सर्व व्यावसायिक अभ्यासक्रमांच्या तर, बी. ए, बीएस्सी व बीकॉम प्रथम वर्षाची परीक्षा सात एप्रिलपासून सुरु झाली. विद्यार्थ्यांची ऑनलाइनपेक्षा ऑफलाइन परीक्षेला अधिक संख्या होती. एकूण परीक्षार्थींपैकी ७० टक्के विद्यार्थी ऑफलाइन परीक्षा देत होते. त्यावरून प्राध्यापक, संघटनांनी नाराजीही व्यक्त केली होती. करोनाची रुग्णसंख्या वाढत असल्याने राज्य शासनाने कडक निर्बंध लावण्याची घोषणा केली. पंधरा दिवस हे निर्बंध असणार आहेत. त्याअनुषंगाने विद्यापीठ प्रशासनाने पदवी परीक्षा पुढे ढकलण्याचा निर्णय घेतला. १५ ते ३० एप्रिल होणारे सर्व अभ्यासक्रमांचे पेपर पुढे ढकलण्यात आले आहेत. आता तीन मे पासून उर्वरित पेपर घेण्यात येणार आहेत. त्या परीक्षांचे सुधारित वेळापत्रक स्वंतत्रपणे कळविण्यात येणार आहे. तर शैक्षणिक वर्ष २०२०-२१च्या द्वितीय सत्राच्या सर्व अभ्यासक्रमांचे ऑनलाइन शिकवणी वर्ग सुरू राहणार आहेत. याबाबत माहिती विद्यापीठाच्या वेबसाइटवरही उपलब्ध करून देण्यात आली आहे. १६ मार्चपासून सुरु झालेल्या पदवी अभ्यासक्रमाच्या परीक्षेस १ लाख २७ हजार १८७ परीक्षार्थी आहेत. ७ एप्रिल रोजी सुरु झालेल्या बीए, बीएस्सी व बीकॉम प्रथम वर्षाच्या परीक्षेस ७६ हजार ४९० विद्यार्थी आहेत. तर व्यावसायिक अभ्यासक्रमाच्या १४ हजार ९४३ विद्यार्थी परीक्षार्थी आहेत. पदव्युत्तरची परीक्षा ५ मेपासून पदवी परीक्षा तीन विविध तारखांना सुरू झाली होती. पदव्युत्तर परीक्षा २७ एप्रिलपासून सुरू होणार होती. ही परीक्षा आता ५ मेपासून सुरू होणार असल्याचे विद्यापीठ प्रशासनाने जाहीर केले आहे. पदवी, पदव्युत्तर परीक्षेला दोन लाख ३० हजार परीक्षार्थी परीक्षा देणार आहेत. ऑनलाइनऐवजी ऑफलाइन परीक्षा देणाऱ्या विद्यार्थ्यांची संख्या अधिक आहे. त्यामुळे उर्वरित पेपर जास्तीत ऑनलाइन द्यावेत, असे आवाहन कुलगुरू डॉ. प्रमोद येवले, परीक्षा व मूल्यमापन मंडळाचे संचालक डॉ. योगेश पाटील यांनी केले आहे.

from Career News in Marathi: Career News, मराठी Career बातम्या | Maharashtra Times https://ift.tt/3acLvE1
via IFTTT