पुणे विद्यापीठातील सर्व शैक्षणिक विभाग १५ ते ३० एप्रिलपर्यंत बंद

म. टा. प्रतिनिधी, सावित्रीबाई फुले पुणे विद्यापीठात करोनाचा वाढत प्रादुर्भाव लक्षात घेता; तसेच राज्य सरकारच्या 'ब्रेक द चेन'च्या आदेशाप्रमाणे सावित्रीबाई फुले पुणे विद्यापीठातील सर्व शैक्षणिक विभाग १५ ते ३० एप्रिलपर्यंत बंद राहणार आहेत. या कालावधीत प्राध्यापक आणि कर्मचाऱ्यांना 'वर्क फ्रॉम होम'च्या सूचना कुलसचिव डॉ. प्रफुल्ल पवार यांनी दिल्या आहेत. विद्यापीठात केवळ अधिकारी, प्राध्यापक, कर्मचारी आणि विद्यापीठातील रहिवाशांना ओळखपत्रानुसार प्रवेश दिला जाणार आहे. पुणे विद्यापीठाशी संलग्न असणाऱ्या महाविद्यालये आणि शैक्षणिक संस्थांनी त्यांच्या आवश्यकतेप्रमाणे कार्यवाही करण्याच्या सूचना दिल्या आहेत. पुणे विद्यापीठातील महत्त्वाची प्रशासकीय कामे सुरू राहण्याच्या दृष्टीने संबंधित विभागाच्या विभागप्रमुखांनी ५० टक्के कर्मचाऱ्यांना आळीपाळीने कामावर उपस्थित राहण्याच्या सूचना द्याव्यात. ज्या कर्मचाऱ्यांना कार्यालयात उपस्थित राहण्याला सवलत मिळेल, अशा कर्मचाऱ्यांनी 'वर्क फ्रॉम होम' करायचे आहे, असेही डॉ. पवार यांनी सांगितले. या कालावधीत अत्यावश्यक कार्यालयीन कामकाजासाठी वरिष्ठ अधिकाऱ्यांनी शिक्षक किंवा अधिकाऱ्यांना हजर राहण्याचे आदेश दिल्यास, त्यांनी त्वरित हजर राहायचे आहे. प्राध्यापक आणि कर्मचारी यांनी पूर्वपरवानगीशिवाय मुख्यालय सोडू नये, असेही सांगण्यात आले आहे. ''कन्टेन्मेंट झोन'मधील प्राध्यापक आणि कर्मचाऱ्यांना कामावर न बोलावता, त्यांना 'वर्क फ्रॉम होम'ची सुविधा देण्याचे नमूद करण्यात आले आहे. दिव्यांग अधिकारी, कर्मचारी यांना उपस्थित राहण्याची सक्ती करू नये; तसेच गर्भवती महिला, अवयव प्रत्यारोपण केलेले कर्मचारी, अधिकारी आदींना उपस्थित राहण्यापासून सवलत देण्यात आली आहे,' असे डॉ. पवार यांनी सांगितले. सविस्तर सूचना विद्यापीठाच्या वेबसाइटवर उपलब्ध असून, अधिक माहितीसाठी कुसचिव कार्यालयाशी ई-मेल किंवा दूरध्वनी क्रमांकावर संपर्क साधण्याचे आवाहन केले आहे. 'परीक्षेचे कामकाज अत्यावश्यक' 'पुणे विद्यापीठाच्या सध्या सत्र परीक्षा ऑनलाइन पद्धतीने सुरू आहेत. परीक्षा आणि परीक्षेच्या संबंधित कामकाज अत्यावश्यक स्वरूपाचे आहे. त्यामुळे परीक्षा व मूल्यमापन मंडळातील अधिकारी आणि कर्मचाऱ्यांच्या उपस्थितीबाबतचा निर्णय घेण्याचे अधिकार मंडळाचे संचालक डॉ. महेश काकडे यांना राहतील,' असे कुलसचिव डॉ. प्रफुल्ल पवार यांनी सांगितले.

from Career News in Marathi: Career News, मराठी Career बातम्या | Maharashtra Times https://ift.tt/32iysMM
via IFTTT