नववी, अकरावी विद्यार्थीही होणार प्रमोट? दोन दिवसांत निर्णयाची शक्यता

म. टा. विशेष प्रतिनिधी, मुंबई पहिली ते आठवीपर्यंतच्या विद्यार्थ्यांना पुढील वर्गात प्रवेश घेण्यासाठी त्यांची वर्गोन्नती करण्याचा निर्णय घेण्यात आला आहे. यानंतर आता नववी आणि अकरावीच्या विद्यार्थ्यांनाही वर्गोन्नती देण्याबाबत हालचाली सुरू झाल्या आहेत. शालेय शिक्षणमंत्री वर्षा गायकवाड यांनी मंगळवारी राज्यभरातील नववी आणि अकरावीच्या विद्यार्थी, त्यांच्या अभ्यासक्रमासंदर्भात आढावा घेणारी एक महत्त्वाची बैठक ऑनलाइन पद्धतीने घेतली. या बैठकीला राज्यातील शिक्षण संचालक आणि इतर महत्त्वाचे अधिकारी उपस्थित होते. या बैठकीत नववी आणि अकरावीच्या विद्यार्थ्यांना वर्गोन्नती देण्याबाबत येत्या दोन दिवसांत जाहीर केला जाईल, असे शालेय शिक्षणमंत्री वर्षा गायकवाड यांनी स्पष्ट केल्याचे समजते. करोनाच्या पार्श्वभूमीवर यंदा अकरावीचे प्रवेश खूप उशिराने सुरू झाले. मागील काही आठवड्यांपर्यंत हे प्रवेश सुरू होते. यामुळे अभ्याक्रम शिकवून पूर्ण झालेला नाही. तसेच नववीच्या विद्यार्थ्यांसंदर्भात राज्यातील विविध विभागाकडून माहिती घेऊन त्यातील विद्यार्थ्यांना वर्गोन्नती करताना त्या विद्यार्थ्यांच्या मूल्यांकनाचा विषय लक्षात घेतला जाईल. त्यासाठीचा निर्णय येत्या दोन दिवसांत घेतला जाणार असल्याचे या बैठकीत स्पष्ट करण्यात आले. दहावी परीक्षा ऑफलाइनच राज्यात दहावी आणि बारावीच्या परीक्षा ऑफलाइन घेतल्या जाणार आहेत. त्यामध्ये तूर्तास कोणताही बदल केला जाणार नसल्याचे त्या बैठकीत सांगण्यात आले. तर ऐनवेळी काही बदल करण्याचा विषय आला तर त्यापूर्वी मुख्यमंत्री उद्धव ठाकरे यांच्या सोबत चर्चा करून त्यावर निर्णय घेतला जाईल, असेही या बैठकीत ठरले असल्याचे सांगण्यात आले. राज्यातील विद्यार्थी आणि पालकांकडून दहावी आणि बारावीच्या या दोन्ही परीक्षा ऑनलाइन पद्धतीने घेतल्या जाव्यात अशी मागणी केली जात आहे. मात्र ही परीक्षा ऑनलाइन घेणे शक्य नसल्याचेही अधिकाऱ्यांकडून सांगण्यात आल्याने त्याविषयी कोणताही निर्णय आजच्या बैठकीत घेण्यात आला नाही. मात्र यापूर्वी परीक्षा ऑफलाइन पद्धतीने घेतली जाईल, असे जाहीर करण्यात आले होते. त्या निर्णयावर शालेय शिक्षण विभाग ठाम असल्याचे समजते.

from Career News in Marathi: Career News, मराठी Career बातम्या | Maharashtra Times https://ift.tt/3wzforH
via IFTTT