CBSE बोर्डाच्या दहावी, बारावीच्या परीक्षा रद्द करण्याची विद्यार्थ्यांची मागणी

कोविड-१९ च्या वाढत्या रुग्णसंख्येच्या पार्श्वभूमीवर, केंद्रीय माध्यमिक शिक्षण मंडळ अर्थात CBSE बोर्डाच्या इयत्ता दहावी, बारावीच्या एक लाखांहून अधिक विद्यार्थ्यांनी ऑनलाइन याचिकेद्वारे सरकारकडे परीक्षा रद्द करण्याची मागणी केली आहे. ट्विटरवर #cancelboardexams2021 हा हॅशटॅगही काही दिवसांपासून ट्रेंड होत आहे. सीबीएसई बोर्ड मात्र परीक्षांच्या आयोजनाच्या निर्णयावर ठाम आहे. सीबीएसई आणि आयसीएसई (काउन्सिल फॉर द इंडियन स्कूल सर्टिफिकेट एक्झामिनेशन CISCE) या दोन्ही बोर्डांनी आरोग्यविषयक संपूर्ण खबरदारी घेण्यात आली असल्याचे स्पष्ट केले आहे. परीक्षांच्या वेळी कोविड-१९ च्या सर्व मार्गदर्शक तत्त्वांचे काटेकोर पालक करण्यात येईल असेही बोर्डांनी स्पष्ट केले आहे. मात्र, विद्यार्थ्यांनी चेंज डॉट ओआरजी वर एका याचिकेत म्हटले आहे की, 'भारतात दिवसेंदिवस करोना स्थिती अधिकाधिक उग्र रुप धारण करत आहे. जेव्हा देशात करोनाग्रस्तांची संख्या कमी होती तेव्हा बोर्ड परीक्षा रद्द करण्यात आल्या होत्या आणि आता संक्रमण चरमसीमेवर आहे तेव्हा शाळा उघडल्या जात आहेत. आम्ही शिक्षणमंत्र्यांना या प्रकरणी विचार करण्याची आणि यावर्षी होणाऱ्या सर्व परीक्षा रद्द करण्याची विनंती करत आहोत. कारण विद्यार्थी आधीच खूप तणावाखाली आहेत.' दरम्यान, #cancelboardexam2021, #Cancelour CBSEboardexam2021 आणि #CancelBoards2021 हे हॅशटॅगही ट्िवटरवर ट्रेंड होत आहेत. यंदा करोना संसर्गस्थितीमुळे बोर्डाच्या परीक्षा विलंबाने सुरू होत आहेत. सामान्य स्थितीत बोर्डाच्या प्रात्यक्षिक परीक्षा जानेवारीत आणि लेखी परीक्षा फेब्रुवारीत सुरू होऊन मार्चमध्ये संपतात, पण महामारीमुळे परीक्षांना विलंब होऊन यंदा या परीक्षा मे-जून महिन्यात होणार आहेत.

from Career News in Marathi: Career News, मराठी Career बातम्या | Maharashtra Times https://ift.tt/3dRAQj9
via IFTTT