पुणे विद्यापीठाचे वेळापत्रक जाहीर; आगामी शैक्षणिक वर्ष १५ जूनपासून

म. टा. प्रतिनिधी, पुणे राज्यात बारावीच्या परीक्षांबाबत अजून निर्णय झाला नसताना, सावित्रीबाई फुले पुणे विद्यापीठाने काही अभ्यासक्रमांचे प्रथम वर्षाचे आगामी शैक्षणिक वर्ष १५ जूनपासून सुरू करण्याचा निर्णय घेतला आहे. या परिस्थितीत विद्यार्थ्यांचे शैक्षणिक नुकसान टाळण्यासाठी विद्यापीठाला शैक्षणिक वर्षाचे नियोजन पुन्हा एकदा 'सूक्ष्म' पद्धतीने करावे लागणार आहे. विद्यापीठाने शैक्षणिक विभाग आणि संलग्न महाविद्यालयांच्या आगामी २०२१-२२ या शैक्षणिक वर्षासाठी पदवी आणि पदव्युत्तर अभ्यासक्रमांचे शैक्षणिक वेळापत्रक जाहीर केले आहे. त्यामध्ये बीए, बीकॉम, बीएस्सी अशा बिगरव्यवसायिक अभ्यासक्रमांचे प्रथम वर्षाचे शैक्षणिक वर्ष येत्या १५ जूनपासून सुरू करण्याचा निर्णय घेतला आहे. त्यानुसार प्रथम सत्र १५ जून २०२१ ते २० ऑक्टोबर २०२१, तर दुसरे सत्र १५ नोव्हेंबर २०२१ ते ३० एप्रिल २०२२ या दरम्यान पार पडेल, असे परिपत्रकात म्हटले आहे. करोनाच्या प्रादुर्भावामुळे राज्यात बारावीच्या परीक्षा पुढे ढकलण्यात आल्या आहेत. या परीक्षेबाबतचा निर्णय जूनच्या पहिल्या आठवड्यात होण्याची शक्यता आहे. त्यानंतर परीक्षा होऊन, निर्णय जाहीर होतील. या संपूर्ण प्रक्रियेत दोन ते तीन महिन्यांचा कालावधी लागू शकतो. त्यानंतर बीएस्सी, बीए, बीकॉम अशा बिगरव्यवसायिक प्रथम वर्ष अभ्यासक्रमांची प्रवेश प्रक्रिया सुरू होईल. मात्र, विद्यापीठाने १५ जूनपासून शैक्षणिक वर्ष सुरू करण्याचा निर्णय घेतला आहे. या निर्णयाला विद्यार्थी, पालक, प्राध्यापकांकडून विरोध होण्याची शक्यता आहे. विद्यापीठाच्या सायन्स अँड टेक्नॉलॉजी, कॉमर्स अँड मॅनेजमेंट, ह्युमॅनिटीज, इंटरडिसीप्लिनरी अशा चारही विद्याशाखांमधील अभ्यासक्रमांचे प्रथम वर्षांसोबतच इतर वर्षांचे प्रथम सत्र आणि दुसऱ्या सत्राचे शैक्षणिक वेळापत्रक प्रसिद्ध करण्यात आले आहेत. त्यानुसार या अभ्यासक्रमांचे शैक्षणिक वर्ष जून ते ऑगस्ट दरम्यान सुरू करण्यात येणार आहे. सध्या सर्व अभ्यासक्रमांच्या दुसऱ्या सत्राच्या परीक्षा १५ जूनपासून टप्प्याटप्प्याने सुरू होणार आहेत. अशा परिस्थितीत या अभ्यासक्रमांचे शैक्षणिक वर्ष पुढे ढकलले जाऊ शकते. 'व्यावसायिक'चे वेळापत्रक स्वतंत्रपणे सीईटी सेलकडून इंजिनीअरिंग, फार्मसी, लॉ, आर्किटेक्चर, एमसीए, एमबीए, हॉटेल मॅनेजमेंट अँड केटरिंग टेक्नॉलॉजी अशा व्यावसायिक अभ्यासक्रमांच्या प्रथम वर्ष प्रवेशासाठी सीईटी परीक्षा घेतली जाते. या सीईटी परीक्षांच्या गुणांवर विद्यार्थ्यांचे महाविद्यालयांत प्रवेश होतात. मात्र, यंदा सीईटी सेलकडून सीईटी परीक्षांचे वेळापत्रक जाहीर करण्यात आलेले नाही. त्यामुळे प्रवेश प्रक्रिया कधी पूर्ण होतील, याबाबत अनिश्चितता आहे. ही बाब लक्षात घेऊन विद्यापीठाने व्यावसायिक अभ्यासक्रमांचे प्रथम वर्षाचे वेळापत्रक स्वतंत्रपणे आगामी काही दिवसांत जाहीर करण्याचा निर्णय घेतला आहे.

from Career News in Marathi: Career News, मराठी Career बातम्या | Maharashtra Times https://ift.tt/3uYO8Bx
via IFTTT