आयसीयूतूनच दिली परीक्षा; विद्यापीठाच्या अट्टाहासाचा विद्यार्थ्यांना त्रास

म. टा. प्रतिनिधी, नागपूर शहर व जिल्ह्यात करोना संक्रमणाची भयावह परिस्थिती निर्माण झालेली असताना तूर्तास विद्यापीठाने परीक्षा न घेता त्या पुढे ढकलाव्यात, अशी मागणी विद्यार्थी व महाविद्यालयांनी केली होती. मात्र, राष्ट्रसंत तुकडोजी महाराज नागपूर विद्यापीठाने परीक्षा घेण्याचा निर्णय कायम ठेवला. अशा स्थितीत अलीकडेच एमटेकच्या एका विद्यार्थिनीला चक्क आयसीयूमधून परीक्षा द्यावी लागली. पुढे दोन दिवसांनंतर करोनाशी लढताना तिच्या आईची प्राणज्योत मालवली आणि तिच्या भावानेसुद्धा आईचे अंत्यसंस्कार करून अभियांत्रिकीची ऑनलाइन परीक्षा दिली. विद्यापीठाच्या सूचनेनुसार, या विद्यार्थिनीच्या महाविद्यालयानेसुद्धा गेल्या आठवड्यात ही परीक्षा घेतली. सध्या जिल्ह्यात करोना संक्रमणाची लाट उसळली असून त्यात अनेक विद्यार्थी व त्यांच्या पालकांचाही समावेश आहे. त्यामुळे विद्यापीठाने तूर्तास परीक्षा घेऊ नये, अशी विनंती अनेक विद्यार्थ्यांनी व महाविद्यालयांनीसुद्धा केली होती. मात्र, ऑनलाइन पद्धतीत काही धोका नसल्याचे सांगत विद्यापीठाने परीक्षेचा घाट घातलाच. अखेर गेल्या आठ‌वड्यात अभियांत्रिकीच्या एमटेक प्रथम सत्राच्या एका विद्यार्थिनीला चक्क आयसीयूमधून परीक्षा द्यावी लागली. तिच्याच वर्गातील इतर दोन विद्यार्थ्यांनासुद्धा करोना संक्रमित असतानाही परीक्षा द्यावीच लागली. ‘मी कशीबशी ही परीक्षा दिली. पण थकवा आणि अंगदुखीचा भयंकर त्रास असल्याने माझा पेपर फारसा चांगला गेला नाही. मी आणि माझी आई आम्ही दोघी इस्पितळात भरती असताना मी ही परीक्षा दिली. पुढे कोव्हिडचा सामना करताना माझ्या आईची प्राणज्योत मालावली. माझा भाऊसुद्धा अभियांत्रिकीचा विद्यार्थी आहे. आईचे अंत्यसंस्कार करून त्याने ऑनलाइन परीक्षा दिली’, असे या मुलीने नाव न सांगण्याच्या अटीवर सांगितले. राज्यकर्त्यांपर्यंत पोहोचली नाही हाक या विद्यार्थिनीसारख्या इतर अनेक विद्यार्थ्यांनी करोनाबाधित असताना परीक्षा दिली आहे. या प्रकारानंतर या विद्यार्थिनीसोबत शिकणाऱ्यांनी मुख्यमंत्र्यांना पत्र लिहिले. तसेच त्यांना ट्विटरवर टॅग करून ही माहिती दिली. मात्र, अद्याप राज्य सरकारच्या कानापर्यंत त्यांची हाक पोहोचलेली नाही.

from Career News in Marathi: Career News, मराठी Career बातम्या | Maharashtra Times https://ift.tt/3o0SfKW
via IFTTT