शिक्षकांकडून फ्रंटलाइन वर्करची कामे; २५ हजार शिक्षक लशीच्या प्रतीक्षेत

मुंबई : राज्यातील सुमारे २५ हजार शिक्षक राज्यांत विविध ठिकाणी करोनाच्या कामात सहभागी झालेले आहेत. ग्रामीण भागांमध्ये कोणत्याही सुरक्षेच्या साधनांशिवाय अनेक शिक्षक डॉक्टरांसोबत काम करत आहेत. करून घेत आहेत, मात्र लस देण्यासाठी प्राधान्य दिलेले नाही. यामुळे या शिक्षकांचे लसीकरण करावे, अशी मागणी होत आहे. राज्यातील करोनाच्या दुसऱ्या लाटेमध्ये ग्रामीण भागातील शिक्षकांना डॉक्टरांसोबत रुग्णालयात कामे नेमून देण्यात आली आहेत. शिक्षकांना सुरक्षेची कोणतीही साधने दिली जात नाहीत. अनेक शिक्षक पीपीई किटशिवायच रुग्णालयात काम करत आहेत. रुग्णांच्या शरीराचे तापमान मोजणे, घरी विलगीकरणात असलेल्या रुग्णांना प्रत्यक्ष भेटी देऊन सेल्फी काढणे, शिधावाटप दुकान, घरोघरी भेट देणे, नाकाबंदीच्या कामामध्ये शिक्षकांची नेमणूक करणे, अशी कामे अनेक जिल्ह्यांत शिक्षकांना दिली आहेत. करोनायोद्धे म्हणून काम करणाऱ्या शिक्षकांना आरोग्याच्या कोणत्याही सुविधा उपलब्ध नाहीत. विमाकवच लागू केलेले नाही. लसीकरण पूर्ण केलेले नाही. त्यामुळे शिक्षकांना जिवाची भीती वाटत आहे. कामाला जुंपले प्रशासनातील अन्य विभागातील कर्मचाऱ्याची उपस्थिती १५ टक्के असताना हक्काची उन्हाळी सुट्टी असतानाही शिक्षकांना कामाला जुंपले आहे. फ्रंटलाइन वर्कर म्हणून कामे करवून घेताना त्यांच्या लसीकरणाकडे राज्य सरकारकडून दुर्लक्ष करण्यात आले आहे. यामुळे शिक्षकांकडून संताप व्यक्त करण्यात येत आहे. त्यामुळे राज्यातील तब्बल २५ हजार शिक्षकांना फ्रंटलाइन वर्कर्स प्रमाणेच लसीकरणास प्राधान्य द्यावे, अशी मागणी महाराष्ट्र राज्य शिक्षक परिषदेचे कार्यवाह शिवनाथ दराडे यांनी केली आहे.

from Career News in Marathi: Career News, मराठी Career बातम्या | Maharashtra Times https://ift.tt/3eOGyUB
via IFTTT