दहावीचे वर्ग यंदाही ऑनलाइन?

म. टा. विशेष प्रतिनिधी मुंबई : करोनाचा वाढता प्रादूर्भाव लक्षात घेता आगामी शैक्षणिक वर्षही ऑनलाइन शिक्षणाचे असेल, असा अंदाज व्यक्त करण्यात येत आहे. यामुळे दरवर्षी मे महिन्यात ऑफलाइन पद्धतीने सुरू होणारे दहावीचे वर्ग यंदा ऑनलाइन सुरू करण्यात आले आहेत. यामुळे विद्यार्थी, पालकांना दिलासा मिळाला आहे. इयत्ता दहावीच्या विद्यार्थ्यांना दर्जेदार शिक्षण मिळावे या उद्देशाने शहरातील काही शाळांनी ऑनलाइन शिक्षण सुरू केले आहे. यामध्ये विद्यार्थ्यांचे दोन तासांचे वर्ग ऑनलाइन होतात. आठवडाभरात सर्व विषयांचे वर्ग घेतले जातात. यामध्ये विद्यार्थ्यांना थीअरीसह काही कृतिशील शिक्षणही दिले जात आहे. दरवर्षी नववीचा निकाल लागला की, दहावीचे अतिरिक्त वर्ग मे महिन्यात सुरू होतात. यंदा हे वर्ग ऑनलाइन सुरू करण्याचा निर्णय घेतल्याचे जोगेश्वरी येथील अस्तिमा विद्यालयाचे मुख्याध्यापक संतोष फडतरे यांनी सांगितले. 'गतवर्षी हे वर्ग जूनमध्ये सुरू झाले होते. मागील वर्षभरात आम्ही सुमारे २९०० तास ऑनलाइन वर्ग घेतले. केवळ वर्गच नाही, तर विद्यार्थ्यांच्या विकासासाठी आवश्यक विविध स्पर्धा, पालक सभाही ऑनलाइन घेतल्या. विद्यार्थ्यांना केवळ ऑनलाइन अध्ययन करून पुरेसे नाही. त्यांचे मूल्यमापन होणेही आवश्यक आहे. यामुळे आम्ही शालेय स्तरावर विविध घटक चाचण्यांचे आयोजन केले. यंदाही अशा प्रकारे नियोजन करण्यात येणार आहे', असे फडतरे म्हणाले. दादर येथील एका शाळेनेही अशाच प्रकारे दहावीचे अतिरिक्त वर्ग सुरू केले आहेत. पालिकाही सज्ज मुंबई महानगरपालिकेने ३० एप्रिलपर्यंत इयत्ता दहावीचे ऑनलाइन वर्ग चालविले. या काळात विद्यार्थ्यांना अभ्यासक्रमाची प्राथमिक ओळख करून देण्यात आली. दरवर्षीप्रमाणे यंदाही एप्रिलनंतर मे महिन्यात हे वर्ग बंद राहतील आणि १ जूनपाासून सुरू होतील, अशी माहिती पालिका शिक्षणाधिकारी महेश पालकर यांनी दिली.

from Career News in Marathi: Career News, मराठी Career बातम्या | Maharashtra Times https://ift.tt/3vVlJMX
via IFTTT