'जीपमॅट'साठी अर्ज करण्यास मुदतवाढ

म. टा. प्रतिनिधी, पुणे बारावीनंतर विद्यार्थ्यांना जम्मू आणि बोधगया येथील इंडियन इन्स्टिट्यूट ऑफ मॅनेजमेंटमध्ये (आयआयएम) प्रवेश घेता यावा, यासाठी पहिल्यांदाच घेण्यात येणारी जॉइंट इंटिग्रेशन प्रोग्राम इन मॅनेजमेंट अॅडमिशन टेस्टच्या () अर्ज प्रक्रियेला मुदतवाढ देण्यात आली आहे. विद्यार्थ्यांना आता ३१ मेपर्यंत परीक्षेसाठी अर्ज करता येणार असून, अर्जात बदल करायला असल्यास पाच ते १० जूनचा अतिरिक्त कालावधी देण्यात आला आहे. जून महिन्याच्या शेवटी किंवा जुलै महिन्याच्या पहिल्या आठवड्यात ही परीक्षा पार पडेल, असे संकेत नॅशनल टेस्टिंग एजन्सीने दिले आहेत. मॅनेजमेंटच्या अभ्यासासाठी विद्यार्थ्यांना बारावी नंतर 'आयआयएम'मध्ये प्रवेश मिळावा, यासाठी पहिल्यांदाच केंद्र सरकारने जीपमॅट घेण्याचा निर्णय घेतला असून, या वर्षीपासून ही परीक्षा होणार आहे. अहमदाबाद, कोलकाता, बेंगळुरू; तसेच देशातील इतर काही शहरांमध्ये असलेल्या 'आयआयएम'मध्ये केवळ पदव्युत्तर पदवी दिली जात होती. आता बोधगया आणि जम्मू येथील 'आयआयएम'मध्ये पदवीचा अभ्यासक्रमदेखील घेतला जाणार असून, त्यासाठी जीपमॅट ही परीक्षा घेण्याचा निर्णय घेण्यात आला आहे. या परीक्षेसाठी अर्ज करण्याची अंतिम मुदत ३० एप्रिल होती. सध्या करोनाच्या प्रादुर्भावामुळे देशात ओढवलेली परिस्थिती पाहता विद्यार्थ्यांना अर्ज करण्यासाठी आणखी एक वर्षाची मुदत देण्यात आली आहे. बारावीच्या परीक्षांना बसलेले, परीक्षेचा निकाल लागलेल्या आणि ६० टक्क्यांहून अधिक गुण मिळालेल्या विद्यार्थ्यांना या परीक्षेसाठी अर्ज करता येणार आहेत. देशातील ७६ शहरात परीक्षा देशातील ७६ शहरांमध्ये ही परीक्षा संगणकाच्या आधारे घेतली जाणार असून, या ७६ शहरांतील सेंटरची यादी वेबसाइटवर जाहीर करण्यात आली आहे. विद्यार्थी आपल्या जवळच्या कोणत्याही सेंटरवरून ही परीक्षा देऊ शकणार आहेत. परीक्षेसाठी अर्ज करताना ते सेंटर नमूद करणे आवश्यक असणार आहे. १० जून नंतर विद्यार्थ्यांना अर्जात नमूद केलेल्या सेंटरमध्ये कोणताही बदल करता येणार नाही. प्रवेश परीक्षेसाठी अशी आहे पात्रता १. बारावी उत्तीर्ण आणि किमान ६० टक्के गुण अपेक्षित २. बारावी परीक्षा दिलेले विद्यार्थी (निकालानंतर ६० टक्के गुण मिळवणे अपेक्षित) ३. कोणत्याही बोर्डातून अथवा कोणत्याही विषयातून बारावी उत्तीर्ण होणे अपेक्षित परीक्षेबद्दलची माहिती दृष्टिक्षेपात १. बोधगया आणि जम्मू येथील 'आयआयएम'मध्ये पदवी अभ्यासक्रमासाठी होणारी पहिलीच प्रवेश परीक्षा. २. विद्यार्थ्यांना अर्ज करण्यासाठी ३१ मेपर्यंत मुदतवाढ. ३. येत्या ३१ मेपर्यंत अर्ज आणि शुल्क भरणे अपेक्षित. ४. अर्जामध्ये बदल करायचा असल्यास पाच जून ते १० जूनदरम्यान करता येणार.

from Career News in Marathi: Career News, मराठी Career बातम्या | Maharashtra Times https://ift.tt/2QGtY0x
via IFTTT