अकरावी प्रवेश: सीईटी सर्वेक्षणाला मुदतवाढ

म. टा. प्रतिनिधी, पुणे अकरावी प्रवेशांसाठी संयुक्त प्रवेश परीक्षा (सीईटी) असावी, का यासंदर्भात सुरू करण्यात आलेल्या सर्वेक्षणाला राज्यातील दोन लाखांहून अधिक विद्यार्थ्यांनी प्रतिसाद दिला आहे. राज्य शैक्षणिक संशोधन व प्रशिक्षण परिषदेने (एससीईआरटी) ही माहिती दिली आहे. या सर्वेक्षणाला मुदतवाढ देण्यात आली असून आता उद्यापर्यंत (मंग‌‌ळवार, ११ मे) विद्यार्थी, शाळांना यात सहभागी होता येणार आहे. दहावीच्या परीक्षा रद्द केल्यानंतर विद्यार्थ्यांचे अंतर्गत मूल्यमापन आणि अकरावी प्रवेश या संदर्भात प्रश्नचिन्ह उभे राहिले होते. त्यावर पर्याय शोधून काढण्यासाठी राज्याच्या शिक्षण विभागाने 'एससीईआरटी'च्या माध्यमातून ऑनलाइन सर्वेक्षण करण्याचा निर्णय घेतला होता. आता या सर्वेक्षणाची मुदत उद्यापर्यंत वाढवण्यात आली आहे. सद्यस्थितीला राज्यातील दोन लाख १४ हजार १६६ विद्यार्थ्यांनी या ऑनलाइन सर्वेक्षणात आपली मते नोंदवली आहेत. हे सर्वेक्षण पूर्ण झाल्यानंतर त्याचा अभ्यास करून सीईटी घेण्याबाबत निर्णय घेण्यात येईल, असेही स्पष्ट करण्यात आले आहे. दरम्यान 'सीईटी'प्रमाणेच दहावीच्या अंतर्गत मूल्यमापनासंदर्भातही शाळांचे ऑनलाइन सर्वेक्षण करण्यात येत असून, शाळांना विद्यार्थ्यांचे अंतर्गत मूल्यमापन करणे शक्य आहे की नाही, याबाबत राज्यातील १४ हजार ३७९ शाळांनी आपले अभिप्राय नोंदवले आहेत. आणखी काही शाळांचे अभिप्राय येणे अपेक्षित असून, त्यानंतरच अंतर्गत मूल्यमापन करणे शक्य आहे, का याबाबत स्पष्टता येणार आहे. या दोन्ही सर्वेक्षणांमध्ये उद्या, मंगळवारी रात्री बारा वाजेपर्यंत विद्यार्थी व शाळांना त्यामध्ये सहभागी होता येणार आहे. एससीईआरटी मार्फत सुरू असलेल्या ऑनलाइन सर्वेक्षणाला विद्यार्थी आणि शाळांचा चांगला प्रतिसाद मिळत असून, सुमारे दोन लाखांहून अधिक विद्यार्थ्यांनी सर्वेक्षणात सहभाग नोंदवला आहे. रविवारपर्यंत या सर्वेक्षणाची मुदत होती. ही मुदत आता उद्या, मंगळवारपर्यंत करण्यात आली आहे. - विकास गरड, उपसंचालक, एससीईआरटी

from Career News in Marathi: Career News, मराठी Career बातम्या | Maharashtra Times https://ift.tt/2SvFagQ
via IFTTT