NEET UG 2021 परीक्षा रद्द करण्याची मागणी सर्वोच्च न्यायालयाने फेटाळली

NEET UG 2021: मेडीकल आणि डेंटल प्रवेश परीक्षा नीट २०२१ रद्द करुन पुन्हा परीक्षा घेण्याची मागणी करणारी याचिका सर्वोच्च न्यायालयाने फेटाळून लावली आहे. सर्वोच्च न्यायालयाचे न्या. एल. नागेश्वर आणि न्या. बी. आर. गवई यांच्या खंडपीठाने हीआज झालेल्या सुनावणी दरम्यान परीक्षेत बसलेल्या १३ उमेदवारांच्या वकील ममता शर्मा यांच्यामार्फत दाखल केलेली याचिका फेटाळून लावली. नीट यूजी २०२१ परीक्षेत सहभागी १३ उमेदवारांनी वकील ममता शर्मा यांच्यामार्फत दाखल केलेल्या याचिकेत राजस्थान आणि उत्तर प्रदेशातील NEET UG 2021 परीक्षेच्या पेपर लीकची कथित प्रकरणे आणि केंद्रीय अन्वेषण ब्युरो अर्थात सीबीआय तथ्य शोध अहवाल लक्षात घेऊन सर्वोच्च न्यायालयाच्या हस्तक्षेपाची विनंती करण्यात आली आहे. NEET UG 2021 रद्द करण्याच्या मागणीच्या याचिकेवर आज झालेल्या सुनावणी दरम्यान सर्वोच्च न्यायालयाच्या विभागीय खंडपीठाने निरीक्षण नोंदविले. त्यानुसार बनावट उमेदवारांचा समावेश आणि कागदपत्रे फुटल्याच्या कथित घटनांमुळे इतर लाखो विद्यार्थ्यांचे नुकसान केले जाऊ शकत नाही. मीडिया रिपोर्टनुसार, NEET परीक्षेत बनावट उमेदवारांना सामील करून आणि विविध कोचिंग सेंटर आणि पेपर सोडवणाऱ्या टोळ्यांकडून प्रत्येक उमेदवाराकडून ५० लाखांची वसूली केल्याच्या आरोपाखाली सीबीआयने चार जण आणि इतर अज्ञात व्यक्तींविरोधात एफआयआर नोंदवला आहे. सीबीआयने नोंदवलेला एफआयआरमुळे मोठ्या कोचिंग सेंटर आणि पेपर सोडवणाऱ्या टोळ्यांचा हस्तक्षेप स्पष्ट होत आहे. गुन्हेगारी कट रचून परीक्षेचा पेपर फोडण्यात आला असे नीट यूजी २०२१ परीक्षा रद्द करण्याची मागणी करणाऱ्या याचिकाकर्त्यांनी म्हटले आहे. सीबीआयच नव्हे तर राजस्थान, उत्तर प्रदेश आणि महाराष्ट्र राज्यांच्या पोलिसांनीही नीट यूजी २०२१ प्रवेश परीक्षेच्या पेपर लीकच्या कथित प्रकरणांमध्ये एफआयआर नोंदवला असल्याचेही याचिकाकर्त्यांनी म्हटले.

from Career News in Marathi: Career News, मराठी Career बातम्या | Maharashtra Times https://ift.tt/3DaLoEZ
via IFTTT