करोनामुळे जेईई मेन परीक्षा लांबणीवर

नवी दिल्ली: नॅशनल टेस्टिंग एजन्सीने जेईई मेन परीक्षा लांबणीवर टाकली आहे. ही परीक्षा एप्रिल २०२० मध्ये होणार होती. करोना विषाणूच्या संसर्गाच्या पार्श्वभूमीवर खबरदारी म्हणून केंद्र आणि राज्य सरकारच्या उपाययोजनांचा एक भाग म्हणून ही परीक्षा पुढे ढकलण्यात आल्याचे एनटीएने म्हटले आहे. देशभरातील एनआयटी, आयआयटी आणि राज्य सरकारी अनुदानित संस्थांमधील इंजिनीअरिंग (अभियांत्रिकी) पदवी अभ्यासक्रमांसाठी JEE Main ही प्रवेश परीक्षा घेण्यात येते. ही परीक्षा ५ एप्रिल ते ११ एप्रिल या कालावधीत होणार होती. जेईई परीक्षेसाठी परीक्षा केंद्र दूरवर असतात. अनेक विद्यार्थी विविध शहरांमधून प्रवास करून परीक्षा देण्यासाठी येत असतात. या सर्वाचा विचार करून हा निर्णय घेण्यात आला आहे. परीक्षेच्या नव्या तारखेची घोषणा लवकरच करण्यात येईल असे एनटीएने कळवले आहे. दरम्यान, केंद्रीय माध्यमिक शिक्षण मंडळाने (सीबीएसई) सध्या सुरू असलेल्या दहावी व बारावीच्या परीक्षा पुढे ढकलण्याचा निर्णय बुधवारी जाहीर केला. भारतातील सीबीएसईच्या या परीक्षा ३१ मार्चपर्यंत पुढे ढकलण्यात आल्या आहेत. परीक्षांचे नवे वेळापत्रक ३१ मार्चनंतर करोनाच्या व्याप्तीचा अभ्यास करून ठरवण्यात येईल, असेही 'सीबीएसई'ने स्पष्ट केले आहे.

from Career News in Marathi: Career News, मराठी Career बातम्या | Maharashtra Times https://ift.tt/2IZQ7iE
via IFTTT