३१ टक्के विद्यार्थी सोशल मीडियावर, ३४ टक्के कंटाळले!

म. टा. प्रतिनिधी, पुणे 'करोना'मुळे मिळालेल्या सुटीत विद्यार्थी ऑनलाइन अभ्यास आणि अवांतर वाचनावर भर देत आहेत. तसेच, मित्र व कुटुंबीयांसमवेत हा वेळ व्यतीत करत आहेत, असे ऑनलाइन कम्युनिटी ब्रेनलीने नुकत्याच केलेल्या सर्वेक्षणातून समोर आले आहे. फक्त आराम करणाऱ्या विद्यार्थ्यांची संख्या ४० टक्के आहे; तर ३४ टक्के विद्यार्थी या सुटीला कंटाळले आहेत. सध्या निर्माण झालेल्या असामान्य परिस्थितीचा शिक्षण आणि शिकण्यावर होणारा परिणाम शोधण्यासाठी हे सर्वेक्षण करण्यात आले होते. या सर्वेक्षणातून निदर्शनास आलेली आणखी एक महत्त्वाची बाब म्हणजे विद्यार्थ्यांचे शैक्षणिक नुकसान रोखण्यासाठी विविध शैक्षणिक संस्थांच्या माध्यमातून डिजिटल शिक्षणावर भर दिला जात आहे. सर्वेक्षणात सहभागी झालेल्या विद्यार्थ्यांपैकी सुमारे ३६ टक्के विद्यार्थ्यांनी आपण घरी राहूनच ऑनलाइन शिक्षण घेत असल्याचे सांगितले. या सर्वेक्षणात २००० हून अधिक विद्यार्थी सहभागी झाले होते. यापैकी ४२ टक्के विद्यार्थी सुट्टीच्या कालावधीतील आपला बराचसा वेळ अवांतर वाचन करण्यासह, कुटुंब, मित्र यांच्यासोबत घालविण्याला प्राधान्य देत आहेत, तर फावल्या वेळेत टीव्ही आणि सिनेमा पाहणाऱ्या विद्यार्थ्यांची संख्याही सुमारे जवळपास ४० टक्के इतकी आहे. त्यानंतर विद्यार्थी सर्वाधिक प्राधान्य सोशल मीडियाचा वापर (३१.९ टक्के) , व्यायाम (२६.१टक्के), व्हिडीओ गेम्स (२४.९ टक्के) एक्स्ट्रा करिक्युलर अॅक्टिव्हिटीज (२३.१ टक्के) यांना देत आहेत. तर ३४ टक्के विद्यार्थ्यांनी आपण या मोठ्या सुटीला कंटाळल्याचेही नमूद केले. या सर्वेक्षणाबाबत ब्रेनलीचे सीईओ आणि सह संस्थापक मिशल बोर्कोव्हस्की म्हणाले, 'आपल्याला मिळालेल्या सुट्टीचा विद्यार्थी सदुपयोग करीत आहेत ही निश्चितच समाधानकारक बाब आहे. तसेच, देशातील असंख्य शाळांनी विद्यार्थ्यांना ऑनलाइन शिक्षण देण्यासाठी विविध 'एड-टेक' मंचांसोबत करार केला आहे. इतर देशांमध्येही पद्धत यापूर्वीच सुरू झालेली आहे. विद्यार्थी आणि त्यांच्या शैक्षणिक समस्यांसाठी मदत शोधणारे पालक ब्रेनलीसारख्या ऑनलाइन लर्निंग प्लॅटफॉर्मकडे वळत आहेत.'

from Career News in Marathi: Career News, मराठी Career बातम्या | Maharashtra Times https://ift.tt/3ailtx9
via IFTTT