करोना इफेक्ट: जगभरात २९ कोटी मुलं शाळाबाह्य!

रोम: जगभरात व्हायरसने धुमाकूळ घातला आहे. करोनाच्या फैलावामुळे खबरदारीचा उपाय म्हणून अनेक देशांमध्ये शाळा बंद ठेवण्यात आल्या आहेत. त्यामुळे इटली आणि अन्य देशांमध्ये सुमारे २९ कोटी विद्यार्थ्यांची शाळा बुडत आहे. आतापर्यंत ९५ हजारांहून अधिक लोकांना करोनाची लागण झाली आहे आणि ३,२०० लोकांचा मृत्यू झाला आहे. आतापर्यंत ८० देशांमध्ये या जीवघेण्या विषाणूचा फैलाव झाला आहे. कॅलिफोर्नियात गव्हर्नर गॅव्हिन न्यूसम यांनी आणीबाणी जाहीर केली आहे. अमेरिकेत बळींची संख्या ११ वर पोहोचली आहे. प्रवाशांमध्ये करोनाची लक्षणं आढळल्यानंतर एका क्रूझ शीपला वेगळं ठेवण्यात आलं आहे. स्वित्झर्लंडमध्येही एका ७४ वर्षांच्या वृद्धेचा मृत्यू झाला आहे. हा येथे करोनाचा पहिला बळी आहे. इराणमध्ये करोनाने ९२ जणांचा बळी घेतला आहे, तेथेही शाळा बंद ठेवण्यात आल्या आहेत. दरम्यान, 'करोना' विषाणूच्या संसर्गाने चीनमध्ये आणखी ३८ बळी घेतले आहेत. मंग‌ळवारपर्यंतच्या एकूण बळींची संख्या चीनमध्ये २,९८१ आणि जगभरात ३,१०० इतकी झाली आहे. चीनमध्ये आतापर्यंत आढळलेल्या पॉझिटिव्ह रुग्णांची संख्या ८०,२७० इतकी झाली आहे, अशी माहिती चीनच्या राष्ट्रीय आरोग्य आयोगाने मंग‌ळवारी दिली आहे. करोना विषाणूवर लस तसेच उपचार निर्माण करण्यासाठी वैज्ञानिक संशोधनाला आंतरराष्ट्रीय स्तरावर सहकार्य करावे, असे आवाहन चीनचे अध्यक्ष शी जिनपिंग यांनी इतर देशांना केले आहे. १३ देशांनी शाळा बंद ठेवल्या आहेत. त्यामुळे २९०.५ दशलक्ष म्हणजेच सुमारे २९ कोटी ५० लाख विद्यार्थ्यांची शाळा बुडाली आहे, अशी माहिती UNESCO ने दिली आहे.

from Career News in Marathi: Career News, मराठी Career बातम्या | Maharashtra Times https://ift.tt/3cu9DBH
via IFTTT