जीडीसी अँड ए परीक्षा लांबणीवर

म. टा. प्रतिनिधी, पुणे शासकीय सहकार व लेखा पदविका अर्थात जीडीसी अँड ए परीक्षा अनिश्चित काळासाठी पुढे ढकलण्यात आली आहे. राज्य शासनाच्या सहकार आयुक्त व निबंधक, सहकारी संस्था या कार्यालयाअंतर्गत शासकीय सहकार व लेखा पदविका मंडळ (जी.डी.सी. ॲण्ड ए. बोर्ड) कडून ही परीक्षा घेतली जाते. ही परीक्षा २२ ते २४ मे या कालावधीत घेण्यात येणार होती. शासकीय सहकार व लेखा पदविका (जी.डी.सी.अँड ए.) परीक्षा व सहकारी गृहनिर्माण व्यवस्थापन प्रमाणपत्र (सी.एच.एम.) परीक्षा करोनाच्या वाढत्या प्रादुर्भावामुळे अनिश्चित काळासाठी स्थगित करण्यात येत आहेत, असे जीडीसी ॲंड बोर्डाचे सचिव व राज्य शासनाच्या सहकारी संस्थांचे उपनिबंधक (परीक्षा व प्रशिक्षण) महेंद्र मगर यांनी कळवले आहे. करोना प्रादुर्भावामुळे देशात ३ मे पर्यंत लॉकडाऊन स्थिती आहे. या कालावधीत होणाऱ्या परीक्षा तर स्थगितच आहेत. मात्र ३ मे नंतर होणाऱ्या परीक्षांच्या बाबतीतही अनिश्चितता आहे. त्यामुळे ही परीक्षा २२ मे ला असूनही ती लांबणीवर टाकण्यात आली आहे. देशातील अन्य राज्यांच्या तुलनेत महाराष्ट्रात करोनाबाधितांची संख्या सर्वाधिक आहे. शिवाय महाराष्ट्रात मुंबई, पुणे या महानगरामध्ये ती सर्वाधिक आहे. त्यामुळे देशातला लॉकडाऊन जरी ३ मे पर्यंत असला तरी महाराष्ट्रातील लॉकडाऊनच्या पुढील स्थितीबाबत अद्याप कोणतीही स्पष्टता आलेली नाही. या सर्व पार्श्वभूमीवर ही परीक्षा पुढे ढकलण्यात आली आहे.

from Career News in Marathi: Career News, मराठी Career बातम्या | Maharashtra Times https://ift.tt/3eGr96G
via IFTTT