लॉकडाऊनदरम्यान 'या' विद्यापीठाने जाहीर केल्या परीक्षा

भारतसह जगभरात करोना विषाणूच्या प्रादुर्भावाने हाहाकार माजला आहे. भारताने या संसर्गावर नियंत्रण ठेवण्याच्या प्रयत्नांचा एक भाग म्हणून जाहीर केला आहे. लॉकडाऊनचा अवधीदेखील एकदा वाढवण्यात आला आहे. देशभरातील सर्व शाळा, महाविद्यालये बंद आहेत. परीक्षा रद्द किंवा लांबणीवर पडल्या आहेत. कोट्यवधी विद्यार्थी त्यांच्या परीक्षेची आणि नव्या वर्षातलं सत्र सुरू होण्याची वाट पाहत आहेत. पण नक्की कोणालाही सांगता येत नाहीए की परीक्षा नेमक्या कधी होणार आहेत. या दरम्यान एक विद्यापीठ असे आहे, ज्याने परीक्षा घेण्याचा निर्णय जाहीर केला आहे आणि लॉकडाऊनदरम्यानच्या काळात परीक्षेचे वेळापत्रकही जाहीर केले आहे. ही युनिव्हर्सिटी आहे महात्मा गांधी युनिव्हर्सिटी. केरळच्या या विद्यापीठाने सत्र परीक्षांच्या तारखांची घोषणा केली आहे. त्यानुसार, सर्व पदवीपूर्व आणि पदव्युत्तर अभ्यासक्रमांच्या चौथ्या आणि सहाव्या सत्राच्या परीक्षांचे वेळापत्रक तयार करण्यात आले आहे. विद्यापीठाच्या यूजी आणि पीजीच्या चौथ्या आणि सहाव्या सत्राच्या परीक्षा १८ आणि १९ मे २०२० या दोन दिवशी होणार आहेत. यासंदर्भातली जाहीरात देखील प्रसिद्ध करण्यात आली आहे. विद्यापीठाच्या खासगी परीक्षांचे नियोजन २५ मे २०२० पासून केले जाणार आहे. चौथ्या, सहाव्या सत्रासाठी प्रॅक्टिकल परीक्षा अनुक्रमे २५ आणि २८ मे २०२० रोजी घेण्यात येणार आहेत. विद्यापीठाने जाहिरातीत असंही जाहीर केलं आहे की परीक्षांची उत्तरपत्रिका तपासणी कधीपासून केली जाणार आहे, त्याचाही निर्णय घेतला आहे. ही प्रक्रिया १ जून २०२० पासून ९ केंद्रांवर सुरू होणार आहे. एका आठवड्यात सर्व उत्तरपत्रिका तपासल्या जाणार आहेत. सत्रनिहाय कुठल्या विषयाची परीक्षा कुठल्या दिवशी होणार, याची सविस्तर माहिती विद्यापीठ नंतर जाहीर करणार आहे. याबाबतची माहिती विद्यार्थ्यांना विद्यापीठाच्या संकेतस्थळावर मिळणार आहे. महात्मा गांधी विद्यापीठ हे केरळच्या महत्त्वाच्या विद्यापीठांपैकी एक आहे. येथे पदवीपूर्व, पदव्युत्तर, एम.फिल. पासून पीएचडीपर्यंत शेकडो अभ्यासक्रम शिकवले जातात.

from Career News in Marathi: Career News, मराठी Career बातम्या | Maharashtra Times https://ift.tt/2VsZPBc
via IFTTT