लेनोवोचे विद्यार्थ्यांसाठी मोफत ऑनलाइन वर्ग

आयटी हार्डवेअर कंपनी लेनोवोने विद्यार्थ्यांसाठी मोफत ऑनलाइन शिक्षण उपलब्ध करून दिले आहे. या प्लॅटफॉर्मवर विद्यार्थ्यांना शिक्षकांकडून वन-टू-वन बेसिसवर मार्गदर्शन मिळणार आहे. कंपनीने SmarterEd हा ऑनलाइन प्लॅटफॉर्म उपलब्ध करून दिला आहे. ना नफा ना तोटा चालवल्या जाणाऱ्या संस्थांशी कंपनीने टाय अप केलं आहे. शिकवण्यासाठी स्वयंसेवकांची नोंदणीही केली जात आहे. लेनोव्हो इंडियाचे सीईओ आणि व्यवस्थापकीय संचालक राहुल अगरवाल म्हणाले, 'आम्ही जे करतोय त्याला कोणताही व्यापारी दृष्टिकोन नाही. स्मार्टरएडच्या माध्यमातून आम्हाला एवढंच पोहोचवायचं आहे की देश सध्या ज्या समस्यांचा मुकाबला करतोय, त्यांच्याशी लढा देताना तंत्रज्ञानाचा कसा हातभार लागतोय. शिक्षण ही एक अशी गोष्ट आहे जिचा थेट तंत्रज्ञानाशी संबंध आहे.' बहुतांश शैक्षणिक संस्थांनी लॉकडाऊनच्या काळात तंत्रज्ञानाचा आधार घेत शिक्षण देण्याचं काम सुरू ठेवलं आहे. अनेक ऑनलाइन प्लॅटफॉर्म्सवर मोफत ऑनलाईन वर्ग घेतले जात आहेत. अगरवाल यांनी सांगितले की लेनोवोने इविद्यालोका या ना नफा ना तोटा तत्त्वावर चालणाऱ्या संस्थेशी भागीदारी केली आहे. 'आम्ही आज स्मार्टरएड सुरू केलं आहे. आता आम्ही ज्यांना शिकवण्याची आवड आहे, अशा स्वयंसेवकांची नोंदणी करून घेत आहोत. शिक्षकांकडे शिकवण्याची डिग्री नसली तरी चालेल. स्वयंसेवक म्हणजे त्याच्या त्याच्या क्षेत्रातला तो तज्ज्ञ असावा,' असे अगरवाल म्हणाले. SmarterEd पाचवी ते बारावीपर्यंतच्या विद्यार्थ्यांना ऑनलाइन शिकवणी देणार आहे. विद्यार्थी त्यांचे शिक्षक, विषय निवडू शकतात. त्यांच्या सोयीनुसार वेळ ठरवून हे ऑनलाइन वर्ग अटेंड करू शकतात. स्मार्टर एडवर NCERT आणि राज्य पाठ्यपुस्तक मंडळाच्या ईबुक्सच्या लिंक्सही देण्यात आल्या आहेत. विद्यार्थी-शिक्षक संवादासाठी एक चॅट इंजिनही आहे. विविध भाषांचे पर्याय मुलांना खुले करण्यात आले आहेत.

from Career News in Marathi: Career News, मराठी Career बातम्या | Maharashtra Times https://ift.tt/2Vn4B3h
via IFTTT