विद्यार्थ्यांपर्यंत पोहोचण्यासाठी शिक्षक झाडावर!

कोलकाता: लॉकडाऊनमध्ये जे लोक घरून काम करत आहेत त्यांना एका मोठ्या अडचणीचा सामना करावा लागतोय तो म्हणजे इंटरनेटच्या लहरीपणाचा. याच इंटरनेट फ्रिक्वेन्सीमुळे हैराण झालेल्या एका शिक्षकाने आपल्या विद्यार्थ्यांपर्यंत पोहोचण्यासाठी एक अनोखी शक्कल लढवली. हे शिक्षक चक्क झाडावर जाऊन बसले! विद्यार्थ्यांपर्यंत पोहोचण्याची ही तळमळ आजच्या काळात खरंच दुर्मिळ. सुब्रत पती (३५) असे या शिक्षकांचे नाव आहे. ते इतिहासाचे शिक्षक आहेत. कोलकाताहून सुमारे २०० किलोमीटर दूर असलेल्या एका गावातून ते इंटरनेटच्या माध्यमातून आपल्या विद्यार्थ्यांपर्यंत पोहोचत आहेत. सुब्रतो सांगतात, 'ऑनलाइन वर्ग घेणे जिकरीचे झाले आहे. कधी माझा मोबाइल चालतो तर कधी थांबतो. रेंज मिळत नाही.' लॉकडाऊनदरम्यान सुब्रतो बाकुडा जिल्ह्यातल्या अहंदा या आपल्या गावी आहेत. ते कोलकाताच्या दोन शिक्षणसंस्थांमध्ये शिकवतात. मोबाइल आणि इंटरनेटची रेंज मिळवण्यासाठी त्यांनी शक्कल लढवली. उंचावर रेंज येते का पाहू म्हणत त्यांनी झाडाचा आधार घेतला आणि चक्क त्यांना याचा फायदा झाला. आता ते रोज सकाळी आपल्या घराजवळच्या कडुनिंबाच्या झाडावर चढतात. झाडाच्या शाखांमध्ये त्यांनी बसण्याचीही व्यवस्था केली आहे. झाडावर मोबाइलला रेंज येते आणि ते विद्यार्थ्यांपर्यंत विनाखंड पोहोचतात. जेव्हा सुब्रतो यांना दोन किंवा तीन वर्गांना सातत्याने शिकवायचे असतात, तेव्हा तर ते पाणी, जेवणही सोबत घेऊन जातात. हवामानामुळे त्यांना त्रास होतो. कडाक्याचं उनही असतं पण यातूनही ते काही ना काही मार्ग काढतातच. यामागे प्रेरणा आहे ती त्यांच्या विद्यार्थ्यांची. सुब्रतो यांच्या वर्गांना विद्यार्थी मोठ्या संख्येने उपस्थित राहतात. विद्यार्थ्यांचा हा प्रतिसादच सुब्रतो यांचे बळ वाढवतो.

from Career News in Marathi: Career News, मराठी Career बातम्या | Maharashtra Times https://ift.tt/2XYDBsJ
via IFTTT