IIT च्या प्राध्यापकांचा दावा; कोव्हिड-१९ ला ५ सेकंदात शोधणार!

नवी दिल्ली: आयआयटी रुरकीच्या प्राध्यापकांचा दावा आहे की त्यांनी एक सॉफ्टवेअर विकसित केलं आहे, ज्या माध्यमातून हा विषाणू संशयित रुग्णाच्या एक्सरे स्कॅनच्या सहाय्याने अवघ्या पाच सेकंदात शोधता येऊ शकतो. हे सॉफ्टवेअर विकसित करण्यासाठी या प्राध्यापकांना ४० दिवस लागले. या शोधासाठी या प्राध्यापकांनी पेटंटही दाखल केले आहे. शिवाय त्यांनी इंडियन काऊन्सिल ऑफ मेडिकल रिसर्च (ICMR) कडे हे सॉफ्टवेअर पडताळणीसाठी देखील पाठवले आहे. कमल जैन असे या प्राध्यापकांचे नाव आहे. आयआयटी रुरकीच्या सिव्हिल इंजिनीअरिंग विभागात ते कार्यरत आहेत. या सॉफ्टवेअरमुळे चाचणीची किंमतही कमी होते, शिवाय सर्वात महत्त्वाचे म्हणजे आरोग्य अधिकारी, कर्मचारी यांना संसर्गाचा धोकाही राहात नाही. मात्र अद्यापपर्यंत वैद्यकीय संस्थेने जैन यांचा दावा पडताळून पाहिलेला नाही. 'मी आधी कृत्रिम बुद्धिमत्तेवर (आर्टिफिशल इंटेलिजन्स) आधारित सॉफ्टवेअर विकसित केले होते. त्यावर ६० हजार एक्सरे स्कॅन डेटाबेसचा अभ्यास केला. यात एक्सरे स्कॅनमध्ये कोव्हिड-१९, न्युमोनिया आणि टीबीच्या रुग्णांचा समावेश होता. या तिन्ही प्रकारच्या रुग्णांच्या छातीतील कफ अन्य कन्जेशनमधील फरक ओळखण्यासाठी हा अभ्यास केला गेला. अमेरिकेतील एनआयएच क्लिनिकल सेंटरमधील चेस्ट एक्सरे डेटाबेसचा देखील मी अभ्यास केला,' असं जैन यांनी सांगितलं. ते म्हणाले, 'मी विकसित केलेल्या सॉफ्टवेअरमध्ये डॉक्टरांना केवळ रुग्णाचा एक्सरे अपलोड करायचा आहे. सॉफ्टवेअर रुग्णाला न्युमोनिया आहे की नाही हे तर सांगतंच शिवाय तो कोव्हिड - १९ पॉझिटिव्ह आहे वा नाही किंवा अन्य कोणत्या विषाणूने ग्रस्त आहे हेही सांगतं. हे रिझल्ट्स अवघ्या पाच सेकंदात मिळतात.' याच प्रकारचं संशोधन अमेरिकेतील युनिव्हर्सिटी ऑफ अॅमेझॉनमध्ये देखील सुरू आहे, असंही जैन यांनी सांगितलं.

from Career News in Marathi: Career News, मराठी Career बातम्या | Maharashtra Times https://ift.tt/2XZrviK
via IFTTT