विद्यापीठ परीक्षांसंदर्भात आज घोषणा?

राज्यातील विद्यापीठ परीक्षांसंदर्भात आज दुपारी घोषणा होण्याची शक्यता आहे. उच्च व तंत्र शिक्षण मंत्री उदय सामंत आज शुक्रवारी ८ मे २०२० रोजी दुपारी १:०० वा. राज्यातील महाविद्यालयीन विद्यार्थ्यांशी परीक्षेसंदर्भात फेसबुक लाईव्ह च्या माध्यमातून संवाद साधणार आहेत. महाराष्ट्रातल्या विद्यापीठांमध्ये आणि संलग्न महाविद्यालयांमध्ये परीक्षा होणार का, कशा होणार, कधी होणार याबाबतची माहिती ते यावेळी जाहीर करण्याची शक्यता आहे. उच्च व तंत्रशिक्षण विभागाने राज्यातील विद्यापीठांच्या परीक्षा घेण्याबाबत मुंबई विद्यापीठाचे कुलगुरू डॉ. सुहास पेडणेकर, सावित्रीबाई फुले पुणे विद्यापीठाचे कुलगुरू डॉ. नितीन करमळकर, एसएनडीटी विद्यापीठांचे कुलगुरू शशिकला वंजारी, कोल्हापूर येथील शिवाजी विद्यापीठाचे कुलगुरू देवानंद शिंदे, तंत्रशिक्षण विभागाचे संचालक डॉ. अभय वाघ, उच्च तंत्रशिक्षण विभागाचे संचालक धनराज माने यांची समिती स्थापन केली होती. या समितीच्या अहवालावर नुकतीच चर्चा करण्यात आली असून, तो आता मान्यतेसाठी राज्यपाल तथा कुलपती भगतसिंह कोश्यारी आणि मुख्यमंत्री उद्धव ठाकरे यांच्याकडे पाठविण्यात आला आहे. या मान्यतेनंतर उच्च व तंत्रशिक्षण मंत्री उदय सामंत परीक्षांबाबत निर्णय जाहीर करतील. विद्यापीठाचीही केवळ अंतिम वर्षाची परीक्षा ? सावित्रीबाई फुले पुणे विद्यापीठाच्या कार्यक्षेत्रात पुणे, नगर आणि नाशिक जिल्हे येतात. करोनाच्या पार्श्वभूमीवर हे तिन्ही जिल्हे रेड झोनमध्ये येतात. त्यातच या तिन्ही जिल्ह्यात रूग्णांची संख्या वाढत आहे. त्यामुळे अशा वेळी महाविद्यालयांमध्ये परीक्षेचे आयोजन करण्यात अडचणी येऊ शकतात. तर, विद्यार्थ्यांच्या सुरक्षिततेच्या दृष्टीने खूप काळजी घ्यावी लागणार आहे. अशा वेळी सावित्रीबाई फुले पुणे विद्यापीठाच्या अभ्यासक्रमांच्या केवळ अंतिम वर्षाच्या परीक्षा होण्याची शक्यता वर्तविण्यात येत आहे.

from Career News in Marathi: Career News, मराठी Career बातम्या | Maharashtra Times https://ift.tt/2SMSUkK
via IFTTT