CBSE २५ देशांतील शाळांचा अभ्यासक्रम पूर्ण करणार

करोना व्हायरसचे वाढते संक्रमण रोखण्यासाठी देशात तसेच परदेशातही अनेक ठिकाणी लॉकडाऊन स्थिती आहे. जगातल्या दोन डझनहून अधिक देशांमध्ये सीबीएसईच्या विद्यार्थ्यांच्या शिक्षणावर या लॉकडाऊन स्थितीचा परिणाम झाला आहे. जगातील विविध देशांमध्ये असलेल्या विद्यार्थ्यांचा शालेय अभ्यासक्रम पूर्ण करण्यासाठी या देशांच्या दूतावासांकडे संपर्क साधला जात आहे. केंद्रीय मनुष्यबळ विकास मंत्री रमेश पोखरियाल निशंक म्हणाले, २५ वेगवेगळ्या देशांमध्ये सीबीएसईच्या शाळा आहेत. आम्ही सीबीएसई अधिका-यांना वेगवेगळ्या देशांच्या परिस्थितीनुसार निर्णय घेण्यास सांगितले आहे. निशंक म्हणाले, प्रत्येक देशातील विद्यार्थ्यांची परिस्थिती आणि समस्या वेगवेगळ्या असू शकतात. सीबीएसईच्या अधिकाऱ्यांना सीबीएसई शाळा आणि परदेशात शिक्षण घेणाऱ्या विद्यार्थ्यांचा अभ्यासक्रम या विषयावर या देशांच्या दूतावासांशी आणि शिक्षण मंत्र्यांशी बोलण्यास सांगितले आहे. दरम्यान, संयुक्त अरब अमिरातीने (यूएई) ऑनलाइन शिक्षण अधिक बळकट करण्यासाठी भारत सरकारकडे मदत मागितली आहे. लॉकडाऊनमुळे युएईमधील सर्व शैक्षणिक संस्था देखील बंद आहेत. अशा परिस्थितीत तेथील विद्यार्थ्यांना ऑनलाईन शिक्षण दिले जात आहे, त्यासाठी यूएईने भारत सरकारकडे संपर्क साधला आहे. निशंक म्हणाले की, 'नुकताच युएईच्या शिक्षणमंत्र्यांशी फोनद्वारे चर्चा झाली. या चर्चेदरम्यान यूएईच्या शिक्षणमंत्र्यांनी सांगितले की त्यांना काही मदतीची गरज आहे. यूएईच्या शिक्षणमंत्र्यांनी ऑनलाईन शिक्षणासाठी मदत मागितली. यावर आम्ही त्यांना सांगितले की ऑनलाईन शिक्षणासाठी आमचा स्वतःचा 'स्वयं' आणि 'स्वयं प्रभा' प्लॅटफॉर्म आहे. आपण तो आपल्या देशासाठी आणि आपल्या विद्यार्थ्यांसाठी वापरू शकता.' आंतरराष्ट्रीय वेबिनारदरम्यान परदेशी विद्यार्थ्यांशी चर्चेदरम्यान निशंक म्हणाले, 'सीबीएसई बोर्डाच्या अधिकाऱ्यांसोबत बैठक घेऊन परदेशात राहणाऱ्या विद्यार्थ्यांसाठी योग्य व्यवस्था करण्याचा आम्ही प्रयत्न करू. मंत्रालयाच्या दीक्षा प्लॅटफॉर्मवर ८०,००० पेक्षा जास्त अभ्यासक्रम साहित्य उपलब्ध आहे. याचा उपयोग ३३ कोटी विद्यार्थी जगाच्या कुठल्याही कोपऱ्यातून करून घेऊ शकतात. मनुष्यबळ विकास मंत्रालयाने दहावी आणि बारावीच्या उर्वरित परीक्षांची तारीख जाहीर केली आहे. या परीक्षा १ जुलै ते १५ जुलै या कालावधीत घेण्यात येणार आहेत.

from Career News in Marathi: Career News, मराठी Career बातम्या | Maharashtra Times https://ift.tt/3coGkA3
via IFTTT